NALANDIG sa tambalanan ang manager sa usa ka security agency nga nagbase sa lalawigan sa Bohol human siya pusila sa riding-in-tandem sa Sitio Hawaiian Brgy Marigondon, dakbayan sa Lapu-Lapu, pasado alas 6:00 kagahapon sa buntag, Oktubre 29.
Ang biktima nailhang si Demetrio Torreon kinsa nakaangkon ug samad pinusilan sa iyang liog ug tiyan.
Matod ni Police Major Juan Capacio, hepe sa Marigondon Police Station sa Lapu-Lapu City Police Office LCPO, nga si Torreon giingong gikan sa ilang pinuy-anan sa Brgy Marigondon.
Samtang nagmaneho kini sa iyang sakyanang Mitsubishi Strada nga may Plate Number NO2023 kalit siya nga gipusil sa mamumuno habig sa iyang driver’s side.
Dili pa hinuon matumbok ni Capacio pila gayud ang gunman ug kun gisundan o ba kaha giatngan ang biktima.
Dali nisibat ang namusil luwan sa motorsiklo, samtang gidala ang biktima sa Mactan Doctor’s Hospital human sa pagpamausil.
“Posible gisabayan kay nagdagan man ni siya unya gipusil mga kaupat man kuno pero limitado kaayo ang estorya pa naay nag-ingon nagmotor ang gunman pero susihon pa nato, wala hinuon ni siya lain sakay ato paghitabo,” matod ni Capacio.
Sa inisyal nga pakisusi sa kapilisan posibleng personal grudge ang motibo sa pagpamusil.
Kini human masuta nga gawas sa pagka manager sa usa ka security agency giingong nangahenti usab ang biktima ug yuta. (GCM)