GIHAMOK sa iyang tanlag hinungdan nga mitahan ang 19 anyos nga si Erlindo Nogas ug miangkon nga iyang nadapatan ang 4 anyos niyang pag-umangkon sa panag-agawan nga unang gikataho nga gipatay sa ungo.
Saysay ni Nogas, base sa iyang extra judicial confession nga hubog siya niadtong adlawng Dominggo, Oktubre 27, 2019 ug iyang nakita si Ashley Baguio, 4 nga nagduwa-duwa sa lapok. Iya kining gitawag apan wa moduol.
Sa iyang kapungot iya kining gitamparos ug tungod sa impact nabanda ang ulo sa bata sa kahoy og nakuyapan.
Matod ni Nogas, ingon sa napanuwayan siya niadtong higayona, inay nga maluoy iya pa kining gituok ug gialsa dayon labay sa bata didto sa kalibunan.
Niapil pa sa pagpangita si Nogas pinaagi sa pagdala og flashlight ug miiwag sa ngitngit nga kalibunan.
Apan gideklarar nga patay ang bata sa dihang gidala sa tambalanan.
Gipaabot ning pamantalaan ang resulta sa autopsy report sa kadaot nga naangkon niini hinungdan sa iyang kamatayon. (GPL)