BAG-ONG sistema ang gipatuman karon sa Cebu South Bus Terminal (CSBT).
Si Cebu Gov. Gwendolyn Garcia nipahibawo sa publiko nga wa nay makasayon-sayon sa pagsud sa CSBT, gawas lang niadtong pasahero o kadto lang adunay ticket.
Kini gituyo aron kalikayan nga adunay mga magtambay sud sa terminal ug aron pagsiguro nga luwas ug convenient alang sa matag pasahero ilabi na nga mohugpa ang gibanabana 50,000 ka mga pasahero niining nagsingabot nga kasaulogan sa Todos Los Santos ug Adlaw nga Minatay, matod ni Garcia.
Nipatawag og tigum si Garcia ngadto sa CSBT management diin gihisgutan ang pagpatuman sa security measures sud sa bus terminal, ilabi na nga buot nga kalugakan ang terminal sa mga dili pasahero o niadtong mga way tuyo.
“To my frustration, this was not followed. That is going to cause problems, in so far as the security of our passengers and even the terminal is concerned, because anybody can just come in,” matod pa ni Garcia.
Ang ticketing agent sa matag bus line nahimutang sa Entrance 2 sa CSBT diin mapalit ang ticket.
Samtang ang Cebu Provincial Operators Transport Cooperative chairman ug Barili Vice Mayor Julieto “Julie” Flores nagtuo nga dili mo-apply ang maong paagi panahon sa peak season ilabi na sa Kalag-Kalag.
Human iyang gihulagway nga dili luwas alang sa mga pasahero nga maglinya gawas nga bahin sa terminal.
Sa pagkakaron, dunay mga lamisa sa gawas diin mapalit ang tiket sa bus. (RTF, FVQ)