NAKA-LIVE pa sa Facebook ang usa ka babaye samtang nagpakamatay gamit ang pisi nga gihikot sa liog niadtong Oktubre 28 sa Villa Trinitas, Barangay Bugo, sa siyudad sa Cagayan de Oro.
Ang maong babaye nailang si Evangeline (bansagon gitago), 40, ug residente sa maong dapit.
Sa impormasiyon gikan sa Cagayan de Oro Police Office (Cocpo), gikabutyag nga nagbilin pa og tulo ka pahina nga "suicide note" si Evangeline diin tipik sa mga mensahe niini mao ang pagpangayo og pasaylo ug naghangyo sa iyang mga igsoon nga atimanon ang iyang duha ka mga anak.
Anaa usab ang listahan niini sa order sa iyang mga kustomer.
Gidugang pa niini nga duna kini problema apan wala na niini gisaysay sa iyang sulat kung unsa gyud ang problema niini.
Gikakurat kini sa iyang mga higala ilabi na nga gi-live pa niini sa social media ang iyang pagpakamatay diha mismo sa ilang panimalay.
Sa imbestigasiyon sa kapulisan, walay nakitang foul play sa kamatayon niini.
Kanunay nga nagpahimangno ang tinugyanan sa City Social Welfare and Development (CSWD) ilabi na ang psychosocial department nga modangop sa ilang buhatan aron matabangan ilabi na ang dunay gihambing nga problema ug nakasinati og depresiyon ug pwedi usab nga makighinabi pinaagi sa ilang page sa CSWD CDO Psychosocial.