MISS, di ka ba delikado masuspenso sa trabaho, kon subra ang imong mahatag sa nagpa-cash og tseke?” sukot sa hamtong nga lalake nga saysintahon na ang hitsura. Crew cut ang tupi niini ug miduol kang Rose, teller sa Green Meadow Commercial Bank.
“Ma-short ko inig-audit sa akong cash on hand. Minusan akong suweldo sa shortage,” ni Rose nga medyo gikulbaan. Bag-o lang nga miabli ang banko. Untop alas nuybe sa buntag pagsulod sa lalake.
“Niay usa ka libo. Iuli ni nako nimo aron di ka ma-short,” sa lalake nga mapahiyumon.
Naniga ang mga mata ni Rose. Nahinumdom siya nga kining tawhana nagpa-cash og tseke gahapon. Nahinumdoman pod niya ang ngalan sa ‘payee’ sa tseke: Atty. Glen Castro. Singkuwenta mil pesos ang balor sa tseke. Paspas si Rose nga niihap sa kuwarta kay gigutom na siya niadtong tungora. Lapas na sa alas dose sa udto pagpailis sa abugado. Gibugkosan gani niyag lastiko human niyag ihap sa 50 ka tibuok taglibo ka pesos. Dayon iya kining gihatag sa abugado. Wa kini ipha sa abugado nga misulod dayon niini sa iyang ‘clutch bag.’
“Pwede ra man unta di nimo iuli, Sir. Di na man ma-trace up kon kinsa akong
nahatagan og subra,” ni Rose. Nagpahiyom siya nga midawat sa papel de baniko.
“Kadaghan na ko kapunit og kuwarta daplin sa karsada. May P500. May P1,000, Akong gigasto kay wa may kakulian. Pero sa sipyat nimo kagahapon, nasayod man gyud kos kakulian. Busa ako gyung giuli kay nagduda sab ko nga gisuwayan lang ko,” matod sa abugado.
“Wa tika suwayi, Sir. Pero karon nasuta na gyud nako nga duna pa gyud diay ‘honest lawyer’. Nganong gibuhat man ni nimo, Sir?” ni Rose. Bisag nalipay nga di siya katapal, nakuryuso sab siya.
“Nakabasa kong panultihon nga nag-ingon nga kon makadawat kag kuwarta nga wa nimo hagoi, duna say maghago nga di kadawat og kuwarta. Di ko gustong mahitabo na. Labi na nga duna koy duha ka anak babaye nga puro ‘teller’ sa banko,” matod sa abugado.
“Hahahahaha! Mao diay! Salamat kaayo, Sir!” ni Rose.
“Way sapayan!” matod sa abugado. “Ug dugang pa gyud, karong tuiga 60 na akong edad. Akong birthday karong Disyembre. Duna koy librong gisulat. Akong e-launch sa akong birthday. Ang ulohan “Balaang Kamatuoran” nga gibase ko sa Bibliya.”
“Reserbahe kog usa ka kopya unya, Sir.” ni Rose.
“Segurado!” sa abugado.
“Tagpila, Sir?” ni Rose.
“Libre. Kay ang kamatuoran gikan sa Bibliya dili angay ibaligya,” sa abugado.
Misamot ang pagdayeg ni Rose sa abugado. Nakuryuso lang siyag samot kon may anak ba kini nga ulitawo.
“Adto na ko,”sa abugado nga mitalikod.
“Sige, Sir,” ni Rose.
Gisundan ni Rose og tan-aw ang bukobuko sa abugado nga nagkalayo paingon sa pultahan. Nakahukom siya nga e-download niya sa Facebook ang nahitabo karon. (KATAPUSAN)