WALAY volcanic activity ang Mt. Apo luyo sa mga nanggawas nga istorya nga lagmit bunga sa pag-alburoto sa Mt. Apo ang mga sunod-sunod nga linog sa North Cotabato.
Kini ang gibutyag ni Philippine Institute of Volcanology and Seismology (Phivolcs) Cotabato seismologist, Rainier Amilbahar subay sa ilang natigayong assessment sa Mindanao sa miaging adlaw nga dunay 6.9 magnitude sa probinsiya.
Sumala Amilbahar nga tectonic in nature ang mga linog karong bulana ug dili volcanic. Gipasabot niini nga di tinuod ang mga nanggawas nga istorya nga posibleng milihok ang ilawom sa Mt. Apo.
Gipaklaro sa opisyal nga walay volcanic activity ang Mt. Apo sanglit ang aktibo lamang nga bulkan duol sa epicenter sa sunod-sunod nga linog mao ang Mt. Matutum.
Ang opisyal nagdugang nga wala say gipakita nga sinyales nga dunay volcanic activity ang Mt. Matutum.
Dugang ni Amilbahar nga dugay nang nakita ang mga fault lines sa epicenter sa linog, apan walay mga datus nga natala nga milihok ang ilawom sa bulkan.
Sa natigayong linog niadtong Martes, natala ang pinakadako nga damyos itandi sa linog niadtong Oktubre 16 diin sa Tulunan sa probinsiya gihapon ang epicenter niini.
"Kung mahitabo gyud nga mobuto na ang Mt. Apo, simba ko lang, tawon, luoy gyud seguro kitang taga Davao, kay malampurnas gyud seguro ta, pero mag-ampo lang ta," ingon ni Lourdes Camoro, 54-anyos, residente sa Barangay 5-A, Bankerohan, Davao City.
Hinuon, gipasabot sa opisyal sa Phivolcs nga dili angay kabalak-an ug dili tinuod nga dunay volcanic activity ang Mt. Apo.