UNOM ka mga katungod sa mga pasahero sa barko ang gipasabot sa Philippine Ports Authority (PPA) labina karon nga gilaumang modagsa ang mga pasahero sa pantalan tungod sa kasaulogan sa Adlaw sa mga Santos ug Kalag.
Kini nga mga katungod angay masabtan labina niadtong mga pasahero nga madelatar, makansela ug wala makaabot sa ilang padulngan.
Si Engr. Isidro Butaslac, port manager sa PPA, nipasabot nga kini kamandoan ni Presidente Rodrigo Duterte nga mahatagan og sayon nga pagbiyahe ang katawhan.
"This is in line of President Duterte to provide value added, comfortable and convenient services to the riding public," matud niini.
Ang Maritime Industry Authority (Marina) nipahibalo nga ang Memorandum Circular 2018-07 usa pa napirmahan niadtong Septiyembre kalabot niining mga katungod sa mga pasahero diha sa barko.
Sa paglusad usab niini, gi-establisar ang Malasakit helpdesk lakip na ang exemption sa mga adunay mga kabilinggan, estudyante, mga senior citizen sa pagbayad sa terminal fees.
Adunay unom ka mga katungod ang mga pasahero kon makasinati sila og problema.
Una, kinahanglan nga masayod ang pasahero nga kanselado o delatar ang ilang biyahe pinaagi sa text, pinaagi sa pag anunsyo nga kinahanglan paminawon labina kon anaa na sulod sa passenger terminal.
Ikaduha mao ang refund niadtong wala makadayon sa biyahe apan nakabayad na sa ilang mga ticket. Kinahanglan nga makuha nila og balik ilang nagasto dili ra maabtan og usa ka semana.
Ikatulo mao ang re-validation of ticket. Kung ang pasahero dili na gusto og refund, kinahanglan niya nga re-schedule ang iyang biyahe nga walay dugang charges.
Ikaupat ang amenidad nga pwedeng ma-enjoy sa pasahero samtang gahulat sa biyahe ang kinahanglan adunay snack o pagkaon, libreng gamit sa komunikasyon facilities sama sa libreng pagamit sa cellphone, telephone ug uban pa hangtod sa panahon nga sila gi skedyul sa ilang sunod nga biyahe.
Ikalima kung wala nahatag ang free accommodation ngadto sa pasahero, hatagan sila og kantidad nga haom sa presyo niini.
Ikaunom mao kining comparable transport kon asa ang mga pasahero kinahanglan nga itransport pinaagi sa barko sa samang operator aron sila moabot sa ilang destinasyon.