70 body cam nadawat na sa kapolisan sa Misamis Oriental

PORMAL na nga gitunol kagahapong adlawa, Oktubre 30, ang body camera nga gipasalig ni Misamis Oriental Governor Bambi Emano ngadto sa nagkadaiyang police station ug special unit sa Misamis Oriental.

Gitunol kini ni Emano Myerkules sulod sa training center sa Capitol ground ngadto kang Police Provincial Director Robert Roy Bahian uban ang mga special unit sa Philippine National Police (PNP) sa Joint Provincial Peace and Order Council, Provincial Disaster Risk Reduction and Management Council, ug Provincial Anti-Drug Abuse Council.

Gitunol ni Emano ang mga body camera ngadto sa 23 ka mga hepe sa Municipal Police Station ug hepe sa duha ka mga city police office, police provincial office, Provincial Mobile Force Company ug ang mga special unit sama sa National Bureau of Investigation, Philippine Coast Guard, Bureau of Fire Protection ug Provincial Drug Enforcement Unit.

"Akong kaakuhan ang seguridad sa atong mga kapolisan ilabina sa inyong kuyaw ug delikado nga operation apan daku pud nakung kaakuhan ang seguridad sa kinabuhi sa matag Misamisnon," pahayag ni Emano.

Butang nga gikalipay og dako ni Bahian, kinsa miingon nga sukad pa kaniadto, suportado na niini ang peace and order sa lalawigan.

"Wala ko magtuo nga ingon ana ang imong pagbati ug pagtagad sa mga kapolisan ni Governor Bambi. Gadgets to reinforce the safety of our law enforcers will mean so much to us," sulti ni Bahian.

Gilauman ni Emano nga ang mga body camera makatabang ug daku sa mga kalihukan sa kapolisan ilabina sa ilang pakigbatuk sa tanang porma sa kriminalidad ug magsilbing instrumento nga magpamatuod sa ilang tiunay nga pagserbisyo sa mga katawhang Misamisnon nga nagatahud sa tawhanong katungod ug dunay dignidad.

Gilauman usab nga magamit ang mga body cam panahon sa mga drug operation aron mahibaloan kon giunsa ang operasyon ug mawala ang pagkwestyon sa katawhan labina kon dunay mapatay sa operasyon. Kini, lakip na sa pagamit diha sa mga checkpoint.