HUMAN sa usa ka tuig nga negosasyon, hingpit nang nidagan sa supply sa Metropolitan Cebu Water District (MCWD) ang tabay nga G11 sa Sitio Pailob, utlanan sa Barangay Sambag 1 ug Sambag 2.
Ang maong bag-ong tabag anaa kini sulod sa luna nga iya sa Southwestern University Phinma diin hingpit na kining nakomisyon sa MCWD niadtong Oktubre 29, Martes.
Mga residente sa Sambag 1 ug Sambag 2 ra usab ang makabenepisyo niining bag-ong supply.
Ang maong bag-ong tabay, makadugang kini og 1,200 cubic meters nga supply sa tubig sa MCWD matag adlaw.
Matod sa tigpamaba sa MCWD, Charmaine Rodriguez-Kara nga usa lang kini sa 30 ka tabay nga planong i-develop sa MCWD isip parte sa short-term nga solusyon sa maong water utility sa water shortage.
Base sa palisiya sa MCWD nga gitakda sa Board of Directors niini niadtong nakalabay nga tuig, ang Mananga ug Lusaran dams laip na ang usa ka desalination plant ang long-term solutions niini.
Gibutyag usab ni Kara nga libre ang pagpagamit sa SWU sa maong tabay apan kinahanglan nga i-prioritize sila sa maong supply, “it’s free use of their property but they have to be prioritized once clients start living there, by then, MCWD would have developed new sources.”
Nasayran nga ang maong luna anaa kini sa dapit diin gitukod ang condo sa SWU.
Duahg ni Kara, “wala naka specify sa contract ilang water demand but the agreement states that their needs will be prioritized and MCWD will only distribute the excess volume.”
Nasayran nga anaa sa 238,000 cu.m. matag adlaw ang ma-produce sa MCWD.
Sugod Agusto ning tuiga, nawagtangan og 20,000 cu.m. matag adlaw nga supply sa tubig ang MCWD tungod sa nagkadaiyang problema sa suppliers niini ug epekto sa el niño sayo ning tuiga.
Usa ning Sambag 1 ug Sambag 2 sa mga apektado dihang niubos pagbalik ang supply sa parehong Buhisan ug Jaclupan dam.
Niadto usab Oktubre 14, dihang nakuha usab sa MCWD ang usa ka tabay sa Barangay Lahug aron mo-supply sa Salinas Drive, Lahug ug Barangay Apas.
Nanawagan usab ang MCWD karon sa local government units, property developers, susama sa condominiums, subdivisions ug susamang negosyo nga mokontak kini sa Water Sourcing Committee sa MCWD alang sa posible nga dugang pang tinubdan sa tubig. (HBL)