NAKAKOLEKTA ang dakbayan sa Sugbo og buhis nga mokabat og P7.4 bilyunes, lakip na sa internal revenue allotment (IRA) gikan sa Enero hangtod sa Oktubre 29 ning tuiga.
Ang target sa dakbayan nga makakolekta og buhis ning tuiga gilatid sa P8.23 bilyunes.
Si Mayor Edgardo Labella maoy unang nipahibawo sa dagan sa panudlanan sa dakbayan ug gikumpirma kini ni Atty. Jerone Castillo, officer in-charge sa City Treasurer’s Office (CTO).
“I am very happy nga kita karon ang Cebu City Government was already able to collect more than P7 billion of taxes and it is only October. Last year it was only P5 billion of the same month because we have massive and efficient tax collection,” nagkanayon si Labella.
Si Castillo nagkapayon nga base sa record sa iyang opisina ang buwan sa Enero maoy adunay labing dako nga koleksyon sa business tax, real property tax ug ubang klase sa buhis.
Sa buwan sa Enero, ang CTO nikolekta og P1.7 bilyones ug gisundan kini og P1.3 bilyones sa Pebrero samtang gikan sa Marso hangtod sa Oktubre, ang ilang koleksyon wala molapas sa P448 milyones ug wala niubos sa P177 milyones.
“Akong nabantayan dako ta sa is also catching up. Mao man to ang atong polisiya that we really have to ease up of doing business, ilang nakit-an nga nindot ang atong poliisya karon nga nga gipatuman ni Mayor Labella,” dugang ni Castillo.
Sa nilabay nga siyam ka buwan, ang City Government nakadawat na og P1.655 bilyones nga bahin sa Cebu City ubos sa Internal Revenue Allotment-IRA.
Si Castillo nagkanayon nga positibo siyang makuha sa iyang buhatan ang P8.2 bilyones nga target sa ilang koleksyon sanglit ang annual budget sa Cebu City karong tuiga niabot og 8.1 bilyones nga maoy gipangayo ni kanhi mayor Tomas Osmeña.
Sa kinatibuk-an, ang Cebu City adunay P1.96 nga bahin sa IRA gikan sa national treasury kon P163.8 milyones matag buwan diin ang siyudad wala pa makadawat para sa buwan sa Nobiyembre ug Disyembre.
Dugang sa OIC City Treasurer nga mosaka pa ang koleksyon sa siyudad kon maaprobahan sa City Council ang ordinansa nga magtugot sa mga deliquent tax payer nga makabayad pinaagi sa amnesty.
Si Castillo nagkanayon nga sa sunod tuig nga maoy unang tibuok tuig nga pagdumala ni Labella, ila pang malabwan kon unsay nakab-ot karon sa Cebu City sanglit ila na unyang ipatuman ang pag integrated computer system nga maoy ilang ibutang sa mga depositary banks sa siyudad para adto na mobayad ang mga tax payer ug dili na sila molinya sa daghang mga tawo.
Ang mayor nipadayag nga dili niya pasakaan ang buhis nga bayranan sa mga real property tax ug business tax apan iyang ipatuman ang maayong pagkolekta sa buhis pinaagi ni Castillo.
“I said during in our campaign, we will never increase taxes, but we will have a massive, efficient tax collection through proper tax profiling and tax mapping. Daghan kaayo nanubo nga condominium, we really have to profile and map them and collect the proper taxes,” dugang sa mayor. (PAC)