SUPERBALITA CEBU

NBI nagsugod na sa ilang imbestigasyon sa Navarro ambush

NAGSUGOD na sa ilang imbestigasyon ang National Bureau of Investigation (NBI) 7 sa pagpusil patay kang Clarin Misamis Occidental Mayor David Navarro human sa mando ni President Rodrigo Duterte.

Ang NBI Dumaguete ug Bohol moabag na usab sa himuon nga imbestigasyon.

Personal nga nangulo sa case conference si NBI Deputy Director for Regional Operation Services Attorney Antonio Pagatpat alang sa pormal nga pagsugod na sa imbestigasyon sa pagpatay kang Navarro niadtong Biyernes, Oktubre 25.

Matod ni Pagatpat nga gumikan sa mando ni Duterte ug department order gikan sa Department of Justice (DOJ) nga naghatag sa katungod sa NBI Central Visayas regional office alang sa imbestigasyon.

Gikonsiderar nila ang kaso nga usa ka command case diin di lang ang buhatan sa NBI 7 ang mohimo sa imbestigasyon sanglit abagan sila sa duha ka district offices.

Kon kinahanglan pa nga abagan ang NBI 7 og dugang mga personahe, ang ilang ulohang buhatan magpadala og mga tawo aron motabang sa imbestigasyon tungod kay seryuso sila sa kaso.

“We are now on the thick of our probe and as much as possible to come up with the conclusion of this case the soonest,” matod ni Pagatpat.

Giangkon ni Pagatpat nga sa pagkakaron ang ebidensya nga naa sa ilang buhatan mao pa lang ang gihatag sa Special Investigation Task Group sa Cebu City Police Office gawas sa inisyal nila nga nakuhang kopya sa CCTV camera.

Tungod niini, magsugod sila sa uno sa pagtigom sa mga ebidensya.

Sa mosunod nga mga adlaw, mohimo sila og kaugalingon nga reenactment sa hitabo base sa pamahayag sa mga saksi sa krimen, kon giunsa paghimo sa mga armadong kalalakin-an.

“Walang pressure except that our number 1 client is the President who himself gave the instructions to investigate this case. Ibig sabihin, it has to be like what we do in our other investigation. It has to be thorough, legal ang impartial,” dugang ni Pagatpat.

Si Tomas Enrile, director sa NBI 7, nagkanayon nga usa sa ilang subayon sa pagsugod sa ilang imbestigasyon mao ang pagsusi kon kinsa kining mga tawo nga naghulga sa kinabuhi sa mayor sa wala pa ang pagpatay, lakip na ang posibling nahimong gikaaway niini didto sa lungsod sa Clarin.

Ang labing importante nga gusto masayran sa NBI unsay motibo sa krimen.

Gihangop usab nila ang pagsalig sa pamilyang Navarro sa NBI aron mahatagan og hustisya ang kamatayon sa biktima.

Pulis ra ba?

Sa pangutana kon ang mga pulis ra ba ang nipusil sa mayor, matod ni Enrile nga sa pagkakaron wa pa silay ebidensya nga magtumbok kanila.

Apan mahimong mapatawag sa imbestigasyon ang mga pulis nga maoy nag escort sa biktima paingun sa Cebu City Prosecutors Office.

Pangutan-on sila kon nganong wa dayon sila makabawos sa dihang namusil na ang killers.

“Makakasampa lang tayo ng kaso kung may ebidensya tayo. At ang ebidensya natin either sa physical evidence or sa mga testimonial evidence. Hindi naman pwedeng (police) kung walang ebidensya,” matod ni Enrile.

Makig-alayon sila sa laing ahensya sa gobiyerno sama sa intelligence department nga makakuha sila og mga impormasyon nga makahatag sa lead sa ilang imbestigasyon.

Andam usab sila nga mohatag sa mga dokumento sa Commission on Human Rights 7 (CHR) kon unsay ilang gikinahanglan apan maampingon sila basin mogawas kini sa publiko.

Way gihatag nga tagal ang NBI national office nga sulbaron ang kaso sa labing dali nga panahon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph