ANG Land Transportation Office 7 mag-monitor sa pagbiyahe sa mga public utility vehicles sa tibuok Central Visayas sugod kagabii hangtod sa Nobyembre 2.
Kini aron di makapahimulos ang mga nagmaneho og de pasaheroan sama sa pagpamahal sa plete gikan sa regular nga pletihan ug overloading.
Ang LTO 7 nitukod og temporaryo nga command center ug nibutang og signages sa mga critical area pag-report sa mga abusadong driver atol sa duha ka adlaw nga kasaulogan.
Kini nahimutang sa Cebu North Bus Terminal, Cebu South Bus Terminal, mga pier sa dakbayan sa Sugbo ug ubang strategic location sa lalawigan sa Bohol, Negros Oriental ug Siquijor.
Aduna say mga organic personnel sa LTO, Highway Patrol Group, Land Transportation Franchising and Regulatory Board nga mohimo og ocular inspection ug mosusi sa mga PUV nga nagbiyahian sa Central Visayas para masiguro nga luwas ang pagbiyahe sa mga tawo nga mouli sa probinsya. Si Pearl Gutierrez sa buhatan ni Regional Director Victor Emmanuel Caindec nagkanayon nga kadtong adunay mga reklamo sa ilang pagbiyahe nga naglangkob sa mga PUV mahimong mo-report sa ilang hotline numbers aron ila dayon kining mahatagan og aksyon.
Matod ni Gutierrez nga ang Malasakit Lounge sa LTO 7 temporaryo una nga gihimo ni Caindec nga command center para maoy modawat sa mga reklamo sa mga pasahero. (PAC)