HAPIT nang makaseguro og luna alang sa 2020 Tokyo Olympics ang Cebuana judoka nga si Kiyomi Watanabe.
Nagkanayon si Philippine Judo Federation president Dave Carter nga ang mopatigbabaw nga 26 ka judokas sa tibuok kalibutan sa matag weight division mao ang maka-qualify sa matag upat ka mga tuig nga kompetisyon.
Si Watanabe, kinsa maoy RP No.1 female judoka, kasamtangang naa sa ika-23 nga puwesto sa women’s -63kgs.
Ang kinahanglan na lang buhaton ni Watanabe aron magpabilin sa iyang puwesto mao ang pagsalmot sa tanang nahabiling Olympic qualifying tournaments.
Nagkanayon si Carter nga dako ang poruhan nga mosaka pa ang puwesto ni Watanabe gumikan kay nakasaad sa patakaran nga ang matag nasod kinahanglang aduna ra’y usa ka representante sa Top 26.
Ang Great Britain adunay tulo ka judokas sa Top 26 samtang adunay tag duha ang Netherlands, Slovenia, China ug Brazil. (RSC, ESL)