Warriors kaging sa Wildcats

GIPAKAGING sa Cebu Institute of Technology University (CITU) Wildcats ang grabe ka inilog nga University of San Carlos (USC) Warriors, 71-69, niadtong Martes sa gabii, Oktubre 29, 2019, sa Cebu Schools Athletic Foundation (CESAFI) basketball college division sa Cebu Coliseum.

Ang beteranong si Mark Kong maoy nahimong bayani alang sa kadaugan dihang napasulod niya ang nakapadaog nga putback shot sa dayong pagkapupos sa oras.

Ang Wildcats, nga ningsaka sa 3-7 nga rekord, gipangulohan ni Jesse Aloro pinaagi sa iyang 23 puntos samtang nidugang og 14 puntos si Karl Ventura.

Wala na man tuod bili alang sa Wildcats ang kadaugan gumikan kay natagak na man silang daan sa elimination round apan seguradong nakahatag kini kanila og dakong moral nga ilang magamit sa umaabot.

Aduna pa’y duha ka nahabiling mga duwa ang Wildcats sa eliminasyon.

Ang Warriors, nga nakaseguro nang daan og luna sa semi-finals, ninghuman sa ilang tahas sa eliminasyon bitbit ang 7-5 nga rekord.

Nakaseguro na man tuod daan ang Warriors og puwesto sa semi-finals apan ang kapildihan dako og apekto sa ilang tinguha nga makasulod sa Top 2 nga adunay pakapin nga twice-to-beat nga

bintaha.

Ning puntoha, ang Warriors maghuwat na lang nga makahuman sa ilang tahas sa eliminasyon ang ubang nakasulod nang daan sa semis nga mao ang Southwestern University (SWU) Cobras (8-2), University of the Visayas (UV) Green Lancers (7-3) ug University of Cebu (UC) Webmasters (7-3).

Sa high school division, gipangmakmak sa Sacred Heart School-Ateneo de Cebu (SHS-AdC) Magis Eagles ang USC Baby Warriors, 78-49.

Ang Magis Eagles mingsaka sa 5-2 nga rekord nga nakapaamag sa ilang poruhan nga makasulod sa semi-finals samtang ang Baby Warriors nangatagak sa 3-7 nga rekord. (ESL)

Related Stories

No stories found.
SunStar Publishing Inc.
www.sunstar.com.ph