NAGPAHIMANGNO karon ang lokal nga kagamhanan sa siyudad sa Cagayan de Oro nga dili motuo sa nagpakatag sa social media kalabot na sa dakong linog nga mohapak sa siyudad.
Una na nga nibutyag ang regional director sa Phivolcs nga si Marcial Labininay nga wala pay kahimanan nga makasulti kung kanus-a moabot ang linog.
Nasayran usab nga nagpagawas og abiso ang National Disaster Risk Reduction and Management nga dili hatagan og pagtagad ang mga nagkalat nga pekeng balita ug mas magbinantayon sa bisan unsa nga kalamidad.
"Hinihikayat ang publiko na huwag magpadala sa mga kahina-hinalang text messages at iwasan ang mag-like, share o mag forward ng mga nasabing pekeng mensahe. Gayunpaman, hinihikayat ang lahat na maging alerto sa anumang banta ng sakuna o kalamidad," butyag ni Nick Jabagat, officer-in-charge sa City Disaster Risk Reduction Management Office (CDRRMO).
Dugang niini nga wala pay naimbento nga bisan unsa nga kahimanan nga makabalo nga moabot ang linog.
"Advisory pud sa Phivolcs anang fake news especially sa social media, sila mismo niingon bisag ang pinaka high tech nga nasud wala pay naimbento nga equipment to predict, mag predict aning panghitabo kaning earthquake, why atong tuhoan," matud ni Jabagat.
Gidugang pa nga kung duna kini mga pagtuon nga posibleng mahitabo, apan walay makaingon kung kanus-a ug unsang orasa mahitabo.
Nagpahimangno usab nga magbinantayon ug alerto sa mga kalamidad nga simbakong masinatian ilabi na nga nakitang wala na-apply atol sa linog ang mga angayang buhaton ilabi na diha sa mga nakita sa social media nga nataranta ug nanagan atol sa pagtay-og.
Samtang nagpasalamat usab si Jabagat nga kalmado ang mga empleyado sa City Hall atol sa nahitabong linog niadtong adlawng Lunes.