MI-RESIGN na si Bise Mayor Mike Rama sa pagka-chairman sa Sinulog Foundation, Inc. (SFI). Gibaliwa lang kuno siya sa bag-ong natukod nga Cebu City Sinulog Governing Board (CCSGB) sa preparasyon niini sa Sinulog 2020. Apan si Mayor Edgardo Labella mipahibawo nga iyang gi-imbitar ang tanang sakop sa foundation apan si SFI President Pericles Dakay lang ang nakatambong nga nagdala sa minutes sa SFI meeting. Gisagop kuno sa CCSGB kining maong minutes nga walay nausab .
Ambut og unsay tinuod nga katarungan sa pag-resign sa bise mayor nga wala makig-estorya sa mayor nga mitawag kaniya human siya mipahibawo sa iyang resignation. Apan unsa ang gipasabut ni VM Rama nga tingalig dunay tawo nga dili kumportable kaniya?
Ang preparasyon ba gyud sa Sinulog 2020 ang na-ingnan sa pag-resign sa bise mayor? Wala ba siya ma-intriga sa mga lindog sa pamantalaan ug sa ubang tawo nga naglarawan kaniya nga wala mahatagi og igong pagtagad isip bise mayor? Tinuod ba nga anaay mga tawo sa mayor nga buot mopadaplin kang Rama? Aduna bay katinuoran ang ubang mga pangagpas nga mao kini ang hustong panahon aron mapakita sa bise mayor ang iyang kahi-ubos sa pagbali-wala kaniya?
Dugay na kaayo nakung nadungog kining tabi nga dili kumportable si Rama niining iyang pagka-bise mayor karon. Gipaabut sa mga nagsunod sa pulitika sa Cebu City nga sa madugay’g-madali mahagtus gayud kining relasyon sa duha ka labing dagkung opisyal sa city hall. Ambot og mao na ba kini ang ilang gipaabut. Miingon hinuon si Mayor Labella nga ang ilang relasyon ni Rama “solid as rock.” Suma sa bise mayor nga magpabilin siyang kaabag ni Labella. Hangtud kanus-a man kini? Kay kon mabugto na sa hingpit ang maayong relasyon sa duha, mabahin na usab unya ang mga sakop sa Cebu City council ug mamiligro na ang mga ordinansahon sa administrasyon. Kining iyang pamahayag nga “For me, I have crossed the Rubicon, the die is cast” alang ba lang gayud kini sa Sinulog Governing Board? Naa man usay mga tawo nga nagtuo nga nakahukom na gayud nga mudagan sa pagka-mayor si VM Rama batok kang Labella ug ubang kaatbang. Kon mahitabo kini, mobalik na usab ang gikahadlukan kaniadto nga mapildi sila sa kandidato sa Bando Osmena – Pundok Kauswagan (BOPK) kay mabahin man ang mga dumadapig sa Labella-Rama team.
Daghan pa hinuon kaayong mahitabo. Usa niini nga tingalig way eleksiyon sa 2022 kun i-pakanaug ni Presidente Rodrigo Duterte and martial law. Laing posiblidad nga dili na modagan pag-usab si Mayor Labella sa wa ta masayud nga katarungan. Murag gihisgutan baya kini ni Labella sa dihang nag-debate sila ni kanhi mayor Tomas Osmena nga posible nga siya “one-term mayor” lang. Namahayag sad kuno ang mayor nga ayuhon niya ang pagpadagan sa Cebu City aron adunay maayong handumanan ang katawhan bisan kon dili na siya magpapili pag-usab. Hinaut pang dili mograbe ang relasyon sa duha tungod kay ang dakung ma-apektuhan niini mao ang mga taga Cebu City. (mannyrabacal1144@gmail.com)