Sa di pa ang Adlaw sa mga Santos ug Adlaw sa mga Kalag, nahimo nang tipik sa selebrasyon ang Halloween, kasagaran gisaulog sa mga nasod sa Kasadpan sa Oktubre 31.
Ang kasaulogan sa Romano Katolikong simbahan, gihalad alang sa mga santos ug martyr sa pagtuo, di kabahin sa mga abat, ungo ug uban pa, sa Nobiyembre 1 ug 2. Nasagulan lang kini sa buhat nga di iya sa simbahan nga niadto pa sa panahon sa mga pagano gihimo.
Busa, itisok sa tagsa-tagsa nato ka kaugalingon nga karong adlawa ug ugma, alang kini sa mga santos nga toa na sa langit gibayaw sa Diyos ug sa mga kalag.
Panahon kini sa paghandom sa mga minahal nga ningtaliwan na ning kalibutan. Karon diay panahon sa pag-ampo, paghalad og panahon sa paghinumdom nila bisan wa na sila sa kalibutan.
Gani, dunay manghalad og pagkaon, buwak ug managkot og kandila sa lubnganan. Kini mga simbolo diay.
Ang pagkaon di aron ipakaon sa kalag. Kini simbolo nga sa makausa, gikauban nato sila dinhi sa kalibutan sa mga buhi.
Ang mga buwak maoy simbolo sa pagmahal hinungdan nga sila gihandom bisan dugay na silang ningbiya ning kalibutana.
Ang kandila simbolo sa atong pangindahay ngadto sa Ginuo, nga ang mga kalag sa ningtaliwan na pagadan-agan sa Iyang kahayag aron mopuyo nga magmalinawon.
Busa karong adlawa, gipahinungod di alang sa mga abat, ungo o unsa pang ginaingon nga makahadlok nga mga linalang, kon di alang sa mga santos nga nagmadaugon batok sa kadautan dinhi sa kalibutan hinungdan nga toa na sila sa langit. Panahon usab sa paghandom sa mga minahal nga mingtaliwan.
Klaro nga ang kasaulogan di mahitungod sa kahadlok, kon di, sa pag-ampo, paghandom ug pagpakita sa gugma sa mga ningtaliwan na ug paghinuklog sa kinabuhi sa mga santos.