Drayber sa usa ka sports utility vehicle (SUV) nga naaksidente nipasangil nga ingon sa gilamat siya og makadiyot sa wa pa moambak ang iyang sakyanan sa center island sa Cebu South Coastal Road sa habig sa Dakbayan sa Talisay.
Matod ni Kieth Riche Tecson, 37, taga Barangay Lawaan 3, Dakbayan sa Talisay, dunay nakabaraw sa iyang panan-aw hinungdan nga nakapiyong siya sa makadiyot ug sa iyang pagmata, nibangga na siya sa mga ali sa center island.
Nilahos pa sa pikas nga lane hangtud nga nakadasmag og laing sakyanan.
Swerte nga siya ug ang laing drayber wa nagrabehan sa aksidente atubangan sa Talisay City Fish port, sa Barangay San Roque, Dakbayan sa Talisay, pasado alas 12, Huwebes sa udto, Oktubre 31.
Naigo ni Tecson ang itom nga awto nga gimaneho ni Charlieston Cedeño, hingkod, kinsa gikan sa habagatang’ bahin, padung sa dakbayan sa Sugbo.
Ang duha ang pulos gidala sa tambalanan.
Matod ni Jonathan Tumulak, pangu sa traffic office sa Talisay City, nga nahinabi pa niya si Tecson sa wa pa madala sa ambulansya ngadto sa Talisay City district hospital.
Matod ni Tumulak nga dunay nibaraw sa iyang panan-aw samtang siya nagmaneho.
“Matod pa sa driver aning puti nga SUV (Huyandai Tucson) nga gikan siya og syudad (Cebu City) nya paingon siya og south. While nagdagan kuno siya, dunay naka-disrupt sa iyang panan-aw, so (ni-wink siya). Sa iyang pagmata og balik, didto na nitabok na siya sa center island hangtud naabot na siya sa pikas side sa dan, ug iyang gikasugat ang itom nga awto,”saysay ni Tumulak
Swerte nga nigana ang mga airbag sa duha ka mga sakyanan, hinungdan nga di ra kaayo grabe ang naangkong’ kadaut sa lawas sa duha ka driver.
Si Tumulak, kinsa uban sa taga rescue team ug uban traffic enforcer, dali nga niadto sa lugar.
Si Patrolman Aries Araoarao sa Talisay City Traffic Division nitataw nga bisan sa pamahayag ni Tecson, ila kining susihon kon wa ba kini nakatulog diha sa iyang pagmaneho.
Ila una nga gi-hold ang duha ka mga lisensya sa duha ka mga drayber samtang padayon pa ang duha sa pagpaalim sa tambalanan.
Hinuon mag-depende kini pa sa biktima o sa pamilya niini kon mopasaka ba og kaso batok kang Tecson.
Niadtong Oktubre 14, 2019,sa mao gihapong karsada, usa ka kinabuhi ang nakalas human miambak sa center island ang usaka awto, nga gikan gihapon sa dakbayan sa Sugbo, padung sa habagatan ug niigo sa nagmotorsiklo.