SA paghandom sa mga adlaw sa mga patay, buhi usab kaayo ang nagkadaiya nga panginabuhian bisan na sa mga bata pa.
Usa na niini ang 15 anyos nga batan-ong si Clinton Jimenez, ang niangkon nga excited siya ug susama’g pasko na alang kaniya ang paghandom sa adlaw sa mga kalag ug minatay.
Kay ning panahuna mokita usab siya, diha lang sa simple nga pagpamintal ug lettering sa mga nitso.
Gani sugod pa lang niadtong Lunes, Oktubre 28, mokita na sila matag adlaw og P500 ang labing ug P800 ang labing-dako.
Gilantawan nila nga moabot sa kapin libuan karong adlawa, Nobyembre 1.
Puhunan lang niya sa maong ginagmay nga negusyo P200 alang sa mga pintal ug paint brush nga gamiton.
Matud ni Jimenez nga su’d na sa unom ka tuig na ni niya gibuhat kini uban sa iyang mga barkada.
Ning tuiga wala siya nipadayon sa pagtungha, tungod sa kawad-on.
Matud niya ang kita ning kalag-kalag, ang iyang ipuno sa iyang tigom aron makapadayon og tungha sa grade 9 sa sunod tuig nga abli sa klase.
“Malipay gyud mi basta ingon aron, sa kalag-kalag kay makakwarta man mi. Dire ra sad ko nakat-on ug lettering ug unsaon ang limpyo nga pagkapintal. Ako ni tigumon ang kita, kay aron ka-skwela ko balik next year,” saysay ni Jimenez sa Superbalita Cebu.
Si Clinton usa lang sa gatusan ka mga ginagmay nga nabuhi sa pagpanginabuhi atol sa adlaw sa minatay diha sa Poblacion cemetery sa siyudad sa Talisay.
Anaa usab ang mga mamaligyaay og bulak, kandila, lapida, palimpyo sa nitso ug palibot, mga tubig, pagkaon ug uban pa.
Tungod sa pagsugod og dagsa sa mga tawo, nipatuman na usab sa ilang ‘no entry’ sa mga sakyanan palibot sa mga sam-ang, ang City of Talisay-Traffic Operations Development Authority (CT-TODA), Huwebes sa buntag, Oktubre 31.
Ug anaa na ang Talisay Police, nihimo og matag karon ug unya nga pag-roving sa sulod ug gawas sa mga sam-ang.
Gani atol sa pagsuroy sa Talisay Police sa public cemetery sa Poblacion, usa sa mga naglimpyo ang naimbarguham og sundang.
Kay sugod Oktubre 31, gidili na pagpasulod ang mga mahait nga hinagiban.
Laing duha pa ka bunglay ang gisakmit usab sa mga pulis, hinuon ibalik kini sa tag-iya sa ila na nga paggagawas. FMD