MAKALILISANG gayod ang linog, daghang mga gambalay nga nangadaut labi na sa North Cotabato ug bisan sa Davao City ug mga kasikbit nga lugar ngari sa Mindanao.
Pero palahi sa ta ning tungora luyo sa daghan kaayo aftershocks sa linog. Diri kita karon sa paghisgot ning usa ka problema nga gipadangat ngari kanato. Di man ta imbestigador sa kaso, pero bisan sa gamay nakahatag kita og ideya sa atong mga tigpamasa.
Diha koy higala nga anaa sa otoridad, nagpatabang sab siya nga bisan sa gamay nga pamaagi masayod ang katawhan sa tinuod nga kaagi sa iyang higala nga nag-time deposit og dakong kantidad sa salapi sa bangko.
Una niini, naglisod ko sa pagpaminsar nganong mahilabtan man ang kuwarta sa bangko nga iya sa usa ka depositor? Sa laktud, kuwarta sa depositor, gipangawat sa giingong pipila ka mga empleyado sa bangko nga gidepositohan.
Kini nga bangko, dili lang nato una panganlan gumikan nagpadayon karon ang ilang kaso. Nagpadayon ang imbestigasyon nga giingong lanay pa sa kalamay sa Bohol gumikan mag-usa na katuig ning adlawa, bulan sa Nobyembre ang maong reklamo, walay resulta.
Ing-ini ni, ang depositor nga higala sa akong amiga, misalig tawon aning bangkoha kay ilado kaayo sila karon gumikan sila suma pa ang nanguna sa digital banking.
Dili basta basta ning bangkoha, sikat. Sa ato pa, mosalig gyud ka. Ug ning higala sa akong amiga, didto misalig sa ilang kuwarta nga mokabat sa kapin kun kulang P23 Milyones.
Sayonan ka nianang kantidara? Nan, karon sukad niadtong Nobyembre 2018 mireklamo na ang depositor kay ila naman nga nasayran nga nawagtang na ilang sapi, gani makita subay sa listahan nga gipagula sa bangko, makita ang oras ug kantidad sa pag-withdraw.
Nalisang ko sa pagkakita sa listahan sa withdrawal, gikawat gyud. Karon subay suma pa sa imbestigasyon sa bangko, nasayran nila ang mga mihimo sa pagpangawat, ilaha ra diay nga mga empleyado. Ug ang usa niini, miangkon sa hitabo nga usa sab siya sa miperma nga mapahigayon ang pag-withdraw.
Gisaysay niini, nga ila suma pang gipang-loan ang maong kuwarta, apan ang depositor miingon nga wala gyud siya'y pagtugot nga withdraw-hon ang salapi.
Buot pasabot, nagbuot-buot ang mga empleyado, ilang gikawat suma pa ang salapi subay sa saysay sa depositor sa akong mga kaubanan sa buhat.
Nasayod ang Bangko Sentral ng Pilipinas kung kinsa kini nga bangko, gumikan ubos kini sa ilang superbisyon. Unta mapadali ang imbestigasyon aron mabalik ang kuwarta ngadto sa depositor.
Dili gyod kita kompiyansa sa pagbutang sa atong kuwarta sa bangko kung dako na gyud kaayo. Hinuon naay mga bangko diha nga masaligan, kadtong ilado ug dugay na nga bangko.
Kay kining bangko man gud nga gibutangan sa higala sa akong amiga, bag-o pa kini nga bangko, ug perteng sikata. Busa, ayaw kompiyansa mga higala. Okay ra og ginagmay nato nga savings ug suweldo puwede ra sa ila, pero kung dinagko na unya time deposit pa, kana, mora og delikado na.