POSIBLENG dunay himuong legal nga aksiyon ang lokal nga kagamhanan sa Davao City ug bisan ang mga okupante sa Ecoland 4000 Residences ugaling makita nga dunay pagpasagad ang pagdumala niini.
Mismong si Davao City Mayor Sara Duterte-Carpio ang nagbutyag niini atol sa hamubo nga press conference gawas sa maong gambalay kagahapon sa buntag, Oktubre 31.
Gipasubay na sab sa mayor pinaagi sa City Engineer's Office (CEO) ang pagpagula og condemnation nga di na mapuy-an ang maong condominium sanglit nahugmak na kini atol sa 6.5 magnitude nga linog kagahapon.
Sa impormasyon gikan sa CEO, tulo na ka condemnation ang ilang napagula sa Ecoland 4000 Residences human sa sunod-sunod nga linog sa Mindanao diin ang Davao nakasinati sa pagtay-og.
Sa miaging linog niadtong Oktubre 16, 2019, hangtud sa mga aftershocks niini ug ang linog niadtong Martes, Oktubre 29, nakita ang mga dagkong liki sa haligi sa maong condominium diin dunay lima ka mga andana.
Apan kagahapon sa buntag, nasubli na sab ang linog, hinungdan nga nahugmak na kini ug dili na makita ang parking lot niini.
Sa naunang paghibalo sa Ecoland 4000 Residences, duna silay 56 ka mga kuwarto apan dul-an 20 lamang ang okupado.
Giingon nga human migula ang condemnation sa CEO, ilaha nang gipasabot ang mga okupante, diin ang pipila kanila temporaryo nanghawa apan dunay uban nga wala gyud mihawa.
Ang CEO padayong nagpahigayon og pagpanubay sa pipila ka mga condominium aron maseguro nga dili kini huyang.
Atol sa linog kagahapon, Oktubre 31, makita ang kulbahinam nga pag-rescue sa pipila ka mga okupante.
Sukad sa pagsuwat ning balita, walay natala sa Central 911 nga namatay sa hitabo, apan sa datus sa Davao City Police Office (DCPO), naay 11 na ang nasamdan diin luwas na ang ilang kahimtang ug ang pipila kanila gipailawom sa stress debriefing.
Luyo sa hitabo, posible sab nga mapatawag sa CEO ang atensyon sa kontraktor sa maong gambalay nga maoy labing unang condominium sa dakbayan nga natukod niadtong tuig 2007.
Atol sa linog, nangliki sab ang pipila ka bahin sa Verdon Parc sa Ecoland, diin giingong usa ra sab ang kontraktor niini ug sa Ecoland 4000 Residences.
Gawas sa Central 911, nagdugang sab og puwersa ang Police Regional Office (PRO)-Davao aron makatabang sa pagpaneguro nga luwas ang dapit, subay kini pagbutyag ni Brigadier General Filmore Escobal, ang bag-ong director sa PRO-Davao.
Anaa sab ang Knight Hawk Group, kinsa mitabang sa gilusad nga search and rescue operation ug kinsa migamit og life detector machine aron masuta kung naa bay na-trap sa nahugno nga gambalay.
Subli sab nga mipagula og proclamation order si Duterte-Carpio nga ipasuspenso ang tanang klase gikan sa elementarya padung sa graduate studies sa pampubliko ngadto sa pribadong mga tunghaan.
Apil sa proklamasyon ang pagpasubay sa matag engineer sa tanang establisemento kung duna ba'y liki ang mga gambalay aron mahatagan dayon kini og aksyon alang sa kaluwasan sa publiko.
Wala sab tsunami threat ang maong linog sanglit sa kayutaan sa gihapon sa Tulunan, North Cotabato ang epicenter sa maong pagtay-og.
Nagpahimangno ang lokal nga kagamhanan sa Davao City nga mag-amping gumikan posible nga sunod-sunod ang matigayong aftershocks.