MOKABAT ngadto sa 70 ka mga balay ang nangaugdaw human miulbo ang dakong sunog niadtong Miyerkules mga alas sa Chavez Compound, Zone-2, Cugman ning siyudad sa Cagayan de Oro.

Si Senior Fire Officer 2 Rosalito Caratao sa Bureau of Fire Protection (BFP) nga nahinabi sa Sun.Star Superbalita nibutyag nga nagsugod ang sunog sa panimalay ni Conchita Constantino.

Gani nadala ang magtiayon sa Capitol University Medical Center human napaso ang kalawasan atol sa dakong pag-ulbo sa sunog.

Nasayran nga tungod sa kakusog sa hangin ug ginama sa kahoy ang mga panimalay sa maong dapit dali nga nikaylap sa mga kasikbit nga mga balay.

Brown-out niadtong tungora hinungdan nga walay nabitbit ang mga residente ug daghan kanila ang tapot lawas lamang.

Ang mga residente nga nasunogan mibasol sa BFP sa ilang kalangan pagrespondi hinungdan nga walay puas ang pagkaylap sa sunog.

"Dili na bag-o kanamo ang maong reklamo, tanan nasunogan mag-blame gyod dayon sa BFP," matud ni Caratao.

Gitin-aw niini nga walay sunog nga nahitabo diin ang bombero ang nag-una.

Gibanabanang moabot ngadto sa P5 milyones ang danyos sa sunog ug giingong kandila ang hinungdan sa sunog.

Mitumaw usab ang taho nga hubog ang bana ni Conchita ug sa kasuko niini gilabay ang lamparilya hinungdan sa pag-ulbo sa kalayo.

Apan ang tanan niini, padayon pang gisuta sa BFP ug giimbestigahan labina nga pulos mga tigulang na ang magtiayon.

Ning panahona anaa nagpabilin sa Cugman Barangay Hall ug Cugman Elementary school ang gatosan ka mga tawo mga nasunogan isip evacuation center. Gipanawagan usab ang katawhan nga maghatag og hinabang ngadto kanila.

Gipahimatngonan usab ang katawhan sa pagmabinantayon kanunay labi na nga init kaayo ang panahon karon.