Mokabat sa 70 ka mga balay ang nangaugdaw sa sunog sa dayong udto sa Lunes, Enero 16, 2023 sa sityo Commonwealth, Brgy. Ibo, dakbayan sa Lapu-Lapu.
Si FO2 Mildred Villaban sa Lapu-Lapu City Fire District, sa interbyu sa Superbalita Cebu sa Lunes sa gabii, niingon nga nagsaka ang gidaghanon sa mga balay nga nangasunog samtang nag-abot-abot ang mga tag-iya nga gikan sa trabaho.
Sa mga alas 5:35 sa hapon, mokabat na sa 70 ka balay ang ilang natala.
Nisaka sab ang gidaghanon sa mga pamilya nga apektado, gikan sa 114 ngadto na sa 166 kun 477 ka mga tawo.
Ilang gibana-bana ang danyos nga naa sa P405,000 kay sagad sa mga balay mixed ang materials.
Si Villaban nitug-an nga ang sunog nagsugod sa balay sa usa ka Rosindo Cano, apan tinuon pa nila kon unsay sinugdanan sa kayo.
Wa hinuoy naangol atol sa hitabo ug wa sila naglisod sa pagkombati sa kayo sa dapit nga duol ra sa dagat.
Si Mayor Junard “Ahong” Chan, kinsa ning-apil sa pagkombati sa kayo, ningpasalamat sa kabomberohan sa paspas nga pagpawong sa kayo hinungdan nga wa makaon ang ubang kabalayan.
Ang alarma nadawat sa kabomberohan sa alas 10:57, nakontrolar mga alas 12:05 ug hingpit nga napawong sa mga alas 12:30 sa udto.
“Maayo na lang kay dali ra nga napatay ang kayo ug nadala ra sa pagfire-out sulod sa 20 ka minutos kay di momenus nga adunay 300 ka mga nagsikitsikit nga mga panimalay ang anaa sa maong lugar,” matud ni Chan sa iyang social media post.
Iya usab nga gidayeg ang mga lumolupyo nga nangunay sa pagtabang aron di makakatap og maayo ang kayo.
“Ang atong presensiya sa nahitaboan sa sunog maoy nakahatag og kadasig sa atong firefighters nga mapadali ang pagpatay sa kayo aron dili na sab nga modako ang kadaot,” matud sa mayor.
Daling nipasalig ang mayor sa dinaliang tabang sa mga biktima. (REV)