DUHA ka mga trabahante ang giluba kagahapon mga alas 3:30 sa kadlawon sa Brgy. 35 ning siyudad sa Cagayan de Oro.

Giila ang mga biktima nga mao sila si Edgar Carvero, taga Zone-1, Bulua ug Rogelio Pavelan, 27, taga Woodland Heights, Macasandig ning siyudad, pulos mga trabahante sa Sunburst, Limketkai Center.

Gitumbok nga suspetsado mao si Jhon Carlo dela Piedra, 20, taga Bitan-ag Creek, Lapasan ning siyudad.

Wala masikop ang suspetsado human misibat dihang giresponde sa kapolisan sa Police Station 2 (PS2) sa Cogon.

Gibutyag sa mga polis sa PS2 sa Sun.Star Superbalita nga gikan nag-inom ang mga biktima sa usa ka balay kalingawan sa maong dapit dihang namatikdan na sa suspetsado.

Giingong daan na nga gidumtan ni dela Piedra ang duha sa wala gikabutyag nga rason hinungdan nga igo gyod pagawas sa balay tambalanan sa maghigala giluba kini gamit ang kutsilyo.

Si Carvero naigo sa dughan nga bahin samtang si Pavelan sa iyang likod. Gipangdala ang mga biktima sa Polymedic General Hospital ning siyudad ug gikatahong kritikal ang kondisyon sa maghigala.

Ang kapolisan sa PS2 nipahigayon na og operation sikop batok sa suspetsado diin mga hingtungdan sa biktima desdidong mopasaka og kaso. (SVB)