Siguradong mokulit og pangalan ang Sand’s Getaway Mall nga usa sa mga inila nga landmark sa Danao City, Cebu.
Ang labing unang lifestyle mall anaa na sa Danao City, nga gihulagway nga bus stop mall diin nahimutang usab ang pantalan sa maong dakbayan.
Kon sa naandan nga mga bus stop/terminal ug pantalan sagad mosugat sa inyong panan-aw ang kaguliyang ug dasok sa mga pasahero ilabi na niadtong molinya ubos sa init sa adlaw, alimuot ug ubang discomfort sa paglukat og ticket ngadto sa sa pagpaabot og kasakyan ingon man ang pagpa-abot nga molarga ang imong biyahe.
Apan kining tanan dili na masinate sa taga-Danao City ug kadtong mo-stop over sa maong dakbayan kay gihatagan og kasayon sa Sand’s Getaway Mall ang mga pasahero ingon man niadtong gusto lang mo-unwind o mopalabay sa oras human sa ka-busy sa gimbuhaton.
Ang maong mall nga nahimutang daplin sa baybayon adunay gilapdon nga tulo ka ektarya, ug dili lang kini nagtanyag sa mga kan-anan o tindahan sud sa maong edipisyo kay dasok sa kasuroyan.
Gihulagway nga all-in-one ang maong lugar nga suroyanan, dili lang uban sa inyong ‘significant other’ kay pampamilya ang gitanyag nga amenities ug facilities sa Sand’s Getaway.
PORT TERMINAL / BUS STOP
Convenient alang niadtong mga biyahedor kay nahimutang sa maong mall ang Danao City Port Terminal ilabi na niadtong mga mobiyahe paingon sa isla sa Camotes.
Samtang nagpaabot sa inyong paglarga mamahimong makapahuway sa ilang airconditioned ticketing lounge o mosuroy sud sa mall.
Magsilbi usab ang Sand’s nga bus stop alang niadtong long trip paingon sa norte nga bahin sa Sugbo.
Nagtanyag og libre nga parking sa kadtong mohapit sa Sand’s nga maka-accommodate og 70 ka mga sakyanan.
KAN-ANAN UG UBAN PA
Ang duha ka andana nga lifestyle mall adunay kapin sa 10 ka stores nga naglakip sa restaurants, cafes, fast-food chain, banko, ATM machines, kuwarta padala ug lifestyle shops.
Gawas niini, adunay mga stalls o kiosk nga nagtanyag og milkteas, cakes ug pastries, cosmetics ug load center.
Wa magpa-iwit ang Sand’s sa night life kay ang maong arcade mall adunay restobar nga nahimutang sa ikaduhang andana, plus relaxing sab ang maong establishment gumikan kay overlooking kini ngadto sa dagat ug mini plaza.
Sa mini plaza mamahimo maka-picnic ang pamilya o date uban sa ilang mga mahal sa kinabuhi.
WONDERS OF THE WORLD
Sa wa pa kasuroy sa Sand’s sama ra sab nga nibiyahe ka abroad tungod kay adunay miniature o replica sa mga inila nga tourist spot sa nagkadaiyang nasud nga nahimutang sa maong mini plaza.
Gilangkuban sa Leaning Tower of Pisa, Taj Mahal, Eiffel Tower, Statue of Liberty, Kinderdijk Windmills sa Netherlands ug ang Big Ben sa London.
Siguradong magtagbaw mo og pahulagway sa maong landmarks nga garbo sa maong establisemento.
KALIWANGAN
Adunay e-bingo machine nga nahimutang sa ikaduhang andana sa maong arcade mall.
Nagtanyag sab ang Sand’s og function hall alang niadtong magsaulog og birthdays, wedding receptions o mga social event nga maka-accommodate og 50 ngadto sa 150 ka mga tawo.
Samtang dili maglisod ang mga Senior Citizen ug Persons With Disability (PWD) sa pagisod pagsaka-kanaog sa hagdanan tungod kay adunay gitagana nga elevator.
Sa mga health conscious adunay ipahigayon nga Zumba matag Lunes ug Biyernes sa 5:30 sa hapon ug matag Dominggo sa 5:00 hapon.
Ang Sand’s Gateway abli sa 9:00 buntag ngadto na 9:00 sa gabii.