SUPERBALITA CEBU

Harden, 59 pts. rockets miipsot

ASA MO? Ang guard sa Houston Rockets nga si James Harden (13) ang inusarang nakahansak human makaipsot sa naggwardiya kaniya sa ilang duwa kagahapon batok sa Washington Wizards sa NBA.( AP)

MIPAULBO og 59 puntos si James Harden lakip niini ang usa sa iyang duha ka free throws nga misilyo sa makutas nga kadaugan sa Houston Rockets, 159-158, batok sa Washington Wizards sa NBA.

Si Russell Westbrook mitali og 17 puntos, 14 niini sa fourth quarter, milangkat og 10 ka rebounds ug 12 ka assists, alang sa iyang ikaduhang triple-double performance ubos sa Rockets.

Double-double usab ang gihimo ni Clint Capela nga may 21 puntos ug 12 ka rebounds sa ilang ikatulong daog sud sa upat ka duwa.

Ang Wizards maoy nagkontrolar sa duwa sulod sa kapin tulo ka mga kuwarters, apan gilupig kini sa lahutay sa naghinapos nga bahin sa fourth quarter human mipahagsa ang Rockets og dakong rally nga giduslitan sa tres ni Harden.

Ang kadaugan maoy nagbaliwala sa 46 puntos sa pambato sa Washing nga si Bradley Beal kansang tulo ka free throws sa katapusang 8.1 segundos maoy mitabla sa score, 158-158.

Apan sa paghibalik sa bola ngadto sa Houston, nakakuha og foul si Harden sa dihang padulong kining milusot ug diha sa free throw line naselyo ang ilang kadaugan.

Ang Houston mikolekta og 23 ka triples, unom niini kang Harden, lima kang Eric Gordon ug upat kang Daniel House Jr.

Samtang ang Wizards adunay 20 usab ka tres, pito niini kang Beal ug unom kang Davis Bertans.

Sa laing duwa, mipuga og 30 puntos si Pascal Siakam, 19 niini sa third quarter, midugang og 13 puntos si Fred Vanleet nga may 11 ka assists sa dihang gipukan sa defending champion Toronto Raptors ng Detroit Pistons, 125-113, alang sa ilang ikaupat nga kadaugan.

Kini maoy ikatulong higayon sa karon nga season nga naka 30 puntos si Siakam sulod lang sa unang lima nila ka duwa.

“He wanted the ball every possession,” matod ni Toronto guard Kyle Lowry kinsa midugang og 20 puntos.

Pabiling limpiyo usab ang record sa Cleveland Cavaliers diha sa ilang korte human nila buntoga ang Chicago Bulls, 117-111. Si Kevin Love mitali og 17 puntos ug 20 ka rebounds.

Gimagic sa Orlando ang New York Knicks, 95-83, ug padayong namupo og kadaugan ang Philadelphia Sixers, 117-95, batok sa Minnesota Timberwolves sa duwa nga miagi og kagubot human nagkarambola ang duha ka higanti nga sila si Joel Imbid sa Sixers ug Karl Anthony Towns sa Timberwolves.

Gipakaging usab sa Boston Celtics ang Milwaukee Bucks, 116-105, ug gikuniskunis sa Indiana Pacers ang Brooklyn Nets, 118-108.

Gipahilom sa Portland TrailBlazers ang Oklahoma City Thunder, 102-99, ug gilubong sa Utah Jazz ang title-favorite Los Angeles Clippers, 110-96.

Gipaktong sa Phoenix Suns ang Golden State Warriors, 121-110, ug gitangtangan og korona sa Charlotte Hornets ang Sacramento Kings, 118-111. JBM


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph