GIKATAKDANG moabot na karong Dominggo ang 10 ka mga foreign players nga mga sakop sa NBA G League ug Amerian Basketball Association (ABA) dinhi sa Sugbo aron mopahigayon og sunodsunod nga mga exhibition games sa naglaing lungsod.
Kini maoy gibutyag sa nagpasiugda nga si Alberto Allocillo, ang founder sa Coach 3A Sportscenter.
Mangulo sa team ang guard nga si Roy Clayter kinsa gipaabot nga mopahugyaw sa mga tawo pinaagi sa iang mga hansak. Uban kaniya mao sila si 6-2 Anthony Winningham, 6-6 Jaelen Brown, 6-3 Jaevon Brown, 6-3 De Wayne Charles, 6-3 Jamaal Mitchell, 6-3 Landen Curry, 6-7 Austin Johnson, 6-4 Christopher Richardson ug 6-2 Zjateek Conyers.
Ang grupo gikatakdang unang mopakita sa ilang abilidad didto sa Talibon, Bohol sa Nobiyembre 4 ubos sa pag-imbitar ni konsehal Raul Austria.
Sa Nobiyembre 6, ang grupo nga magdala sa ngalan nga Sirius Star Pilipinas, mobalik dinhi sa Sugbo aron makigduwa sa San Remegio Properties ni Mark Inoc didto sa Lawa-an Oslob ubos sa pagpasiugda sa Tan-awan Oslob Sea Warden and Fishermen Association nga gipangulohan ni Mark Rendon.
Motabok usab kini didto sa Panabo City sa Davao sa Nobiyembre 8-9 diin makigbatok sa Montana Pawnshop ug ingon man sa Tagum City Selection sa Nobiyembre 10.
Matod pa ning duwaa ang kasamtangan most valuable player sa D-League nga si Eliud Poligrates ang mo-reinforced sa team DavNor Selection.
Gikan sa Davao mobalik na usab sa Sugbo ang Sirius Star Pilipinas. Moduwa sila sa Badian, Nobiyembre 15, sa Alegria sa Nobiyembre 16 ug sa Alcantara sa Nobiyembre 17. JBM