BISAN wala pa mahuman ang imbestigasyon sa Bureau of Fire and Protection sa naugdaw nga KMCC Mall sa Kidapawan City, laing sunog na sab ang nahitabo sa maong dapit.
Matud ni Kidapawan City Mayor Rodolfo Gantuangco, doble-doble na karon ang ilang problema gumikan kay bandang alas 11:00 sa buntag, Marso 10, gilamoy sab sa kalayo ang social hall sa Barangay Binuligan Elementary School nga gamiton unta alang sa graduation rites sa mga magtutungha.
Faulty wiring ang gilantaw sa mga otoridad nga hinungdan sa sunog gumikan sa patay-palong nga suplay sa kuryente.
Nasayran nga P300,000 ang kinatibuk-ang danyos sa maong sunog.
Ang nasunog nga KMCC mall, gibana-banang may P207 milyones nga danyos tungod kay naangin pa ang ubang mga tindahan nga duol sa dapit lakip na ang usa ka bangko.
Ang sunog, gibasol sa miawas nga krudo sa generator set nunot sa patay-palong nga suplay sa kuryente sa gipatuman nga rotating brown-out sa National Grid Corporation of the Philippines nga naka-apekto og dako ngadto sa katawhan, ilabina sa mga negusiyante.
Nagkahiusa ang mga personahe sa Cotabato Electric Cooperative ug mga lokal opisyal nga gipangulohan ni Cotabato Governor Jesus Sacdalan sa pagpangayo og dugang suplay sa kuryente sa Mount Apo Geothermal Plant sa barangay Ilumabes, Kidapawan aron dili na makasinati og hataas nga oras sa brown-out ang probinsiya sa Cotabato.
Apan hangtud karon, wala pay desisyon ang Mount Apo Geothermal Plant bahin niini. (Edgardo Fuerzas)