Dear Noy Kulas,
Maayong adlaw. Magpatambag ko nimo parte sa akong married life.
Minyo ko dinhi sa Pilipinas pero minyo sab ko sa gawas. Bale duha ang akong asawa. Ingon ani ang nahitabo. Ni-abroad ko nga ulitawo pa katuigan na ang nakalabay. Samtang didto ko sa gawas, na-meet ug na-close nako ang usa ka foreigner, kanang puti ug pila may estorya, naminyo mi ug nakaanak og usa. Daku na ang among anak karon.
Mag-ulian man ko diri sa Pilipinas ug sa usa namo ka reunion, nagkaabot mi sa akong girlfriend kaniadtong high school pa mi. Constant ang among communication until nagkauyab mi og balik kay dalaga pa man siya. Nagpatuo ko nga ulitawo pa gihapon ko. Unya nimabdos man siya bisan medyo taas na ang among edad mao nga napugos ko pagpakasal sa huwes diri. Nakalusot ra ko pinaagi sa pagmaneobra sa ubang documents.
Karon ang akong problema kay ang akong asawa dinhi gustong mo-migrate uban nako. Ako ra siyang gisaadsaaran kay basin mabuking ko, magubot unyag maayo. Unsa may akong buhaton?
MING
Ming,
Motug-an ka man o di, sa madugay o sa madali, mabuking ra gihapon ka ug magkagubot ra gihapon na kay way aso nga makumkom. Sa madugay o sa madali, mahibaw-an ra gihapon ang imong sekreto. Busa, samtang sayo pa, I-confront ang problema, ayaw I-postpone. Kon unsa man ang consequence, dawata kay bunga man ni sa imong hinangggaw, sa pagpamakak. Apan timan-i kanunay nga ang tanan molabay lang. Busa, ayaw kahadlok sa pag-angkon nga ikaw minyo, dunay anak.
Mopatigbabaw ra ang gugma, kana kon nahigugma na nimo ang imong ikaduhang asawa. Apan kay minyo man diay ka, kanang imong ikaduhang kaminyuon null and void sa sinugdan pa lang. Niangkon ka man gani nga gimaneobra ang pipila ka mga dokumento aron makalusot ka. Apan bisan unsa pay mahitabo sa inyong kaminyuon, ang bata nga inyong anak dunay katungod nga maningil sa imong suporta ug dunay bahin sa bisan unsa nga katigayunan nga imong mabilin.
Pag-ampo sa Ginuo ug pagpangayog pasaylo sa imong gibuhat ug sa imong gilimbungan nga babaye nga seguradong masakitan.
NOY KULAS