KASAGARAN, ma ulitawo , daga o minyo, mawad-an og gana bisag unsa pa ka anyag o ambungan kung makakita sa ilok nga naglagom, dagha’g balhibo labi na og manimaho pa gayong anghit.
Mao sab kini rason nganong mo atras o magpalayo na ang uban unya ang tagtungod sab nga na-uwawan di na ganahan mag sul-ob og sleeveless nga sinena o bathing suit. Unya kung di mahatagan og alibyo sa ngadto-ngadto mawad-an na kini og kumpiyansa sa kaugalingon.
Unsa may maka-ingon sa paglagom?
Nag-una sa listahan sa Healthline kining mga pahumot sa ilok (deodorants) kay kini dunay mga sagol nga chemicals nga makapakatol ug itom.
Ang paggamit og shave sa pagtangtang sa buhok sa ilok makapalagom sab kay ang agi sa hait nga blade makagasgas sa panit og maka-ingon sa katol-katol.
Sunod kining dead skin nga nagla-undok kay way lugod-lugod o exfoliate. Ang ilokan sab sa sinena nga kanunay mabag-id sa ilok makasamot sab palagom.
Gawas ini kining acanthosis nigrigans nga timailhan kung dunay diabetes, ka tambok o abnormal nga hormone level , erythasma kon bacterial infection ug melasma (mga pat-ak pat-ak nga lagom sa lawas) makapasamot sa paglagom.
Unsaon man pagpaputi og balik?
Unahon pag-ilis ang brand o klasi sa deodorant nga gigamit. Mahimo sang mogamit og mga natural nga alternatibo sama sa tawas, baking soda o ba kaha apple cider nga suka.
Undangon dayon ang pagpanigarilyo ug pag shave. Hinuon suwayi ang magpa-wax o ba kaha kung may kaya magpa laser hair removal.
Sama sa pag-atiman sa nawong, ang ilok sab angay luguron o exfoliate bisag ka tulo sa usa ka semana labi na kada kaligo.
Ang pag sul-ob og luag nga sinena labi na sa may bukton ug ilokan nga bahin maka tabang sab pagpaputi og balik.
Niadtong gusto og natural nga paagi pagpaputi mahimong mogamit og duga sa patatas nga ipahid og pa-ugahon mga 10 minutos. Mahimo sab ang pinikas-piklas nga Cucumber, Lemon o panit sa Orange nga ihaklap sa ilok mga 10 minutos dayon trapuhan og bugnaw nga tubig.