SAMTANG nagdasok ang mga pasahero sa mga terminal sa bus, pantalan ug tugpahanan aron mopauli sa ilang tagsa tagsa ka probinsiya ning panahon sa kalag kalag, dunay daghan ang nagpabilin lang sa ilang pinuy-anan.
Ang uban may trabaho nga di ka biyaan. Sama sa mga doktor, nurse, ug ubang trabahante sa ospital. Ang uban nagbantay sa mga establismento isip security guard.
Ang mga pulis ug sundalo wa tugti nga makabakasyon kay may obligasyon nga giatiman. Ang mga bombero ug guardia sa mga prisohanan di sab makabiya sa ilang tagsa tagsa ka responsabilidad.
Bisan ang mga sakop sa media may mga assignment nga angay atimanon.
Ang mga nanarbaho sa mall ug ubang tindahan may mga customer nga asikasohon. Bisan ang mga gasoline boy ug kadtong nagtrabaho sa mga kan-anan di basta basta makabakasyon. Samot na ang mga driver sa mga bus nga naghakot sa mga pasahero.
Unsa na kaha sa mga way budget tungod sa kawad-on. Duna pay daghan nga naghandum nga maka bisita sa ilang mga minahal sa kinabuhi nga tua gilubong sa probinsiya.
Ang naandan nga buhaton modangop sa dakong krus ug adto usahon ang mga pangaliya ug pagpanagkot. Ingon niini man ang nahitabo nako kaniadto sa nagtrabaho pa ko sa Makati ug Baguio human sa akong gradwasyon.
Ang salapi nga gamiton para sa biyahe ipada nalang puno puno sa budget sa hikay para ihalad sa altar. Ang dakong krus sa mga sementeryo maoy dangpanan di lang gani panahon sa kalag kalag.
Sayo ko nga nakapanagkot sa sam-ang sa Pardo dakbayan sa Sugbo niadtong Martes. Sa ako nang pagpagawas sa sementeryo akong nahimamat ang Poblacion Pardo Disaster Risk Reduction Chief Michael Abarquez.
Among gituki ang pipila ka isyu nga may labot ang siguridad sa mga tawo sa sud sa sam-ang. Akong gipaambit kanila ang akong kabalaka simbako ang sunodsunod nga linog sa Mindanao mahitabo dinhi sa ato ning panahon sa kalag kalag.
Ang giingon ni Michael ang tugkaran sa simbahan maoy haum nga evacuation center. Ang lain nakong gipangutana kong dunay alarma sa sunog sa palibot sa sementeryo. Ang iyang tubag mao ang paghawan sa mga tawo kong gikinahanglan nga mosud ang mga trak sa bombero.
Hibalo tang tanan nga ang trahedya mahimong mahitabo nga di magsaba.
Sa iyang bahin ang nahibalik nga Disaster Officer sa Kapitolyo nga si Niel Sanchez naabtan nako sa South Bus terminal nga nakig-alayon sa management pinangulohan ni Carmen Quijano.
Si Niel usa sa pinaka respetado nga tawo kong maghisgut ta og Disaster preparedness gitakda nga mohimo og evaluation sa tanang matang sa pagpangandam sa tibuok probinsiya sa mosuhid nga mga adlaw.