GIBUTYAG ni Rubilyn Amit nga bisan sa kataas sa iyang kasinatian sa duwang billiards, bation gihapon siya og pressure sa matag higayon nga moduwa siya sa international stage.
Hilabi na ning higayuna nga ang iyang umaabot nga salmutan nga mao ang Southeast Asian Games ipahigayon sa Pilipinas.
“The first time I played was here in the Philippines in 2005 and 14 years after eto na we’re hosting again and I’m a veteran now. The pressure’s still there, hoping na manalo kami ng gold medals for the country,” matod ni Amit sa interbyu sa Gametime sa ABS-CBN.
Ning maong kompetisyon, si Amit, kinsa lumad nga taga Mandaue City, nakahakot na og lima ka gold medals kaniadto. Nahimo na sab siyang world champion.
Nag-agak kang Amit sa iyang preparasyon mao ang laing beteranong bilyarista sa nasod nga si Francisco Bustamante, kinsa maoy usa sa coaches sa billiards national team.
“Halos lahat ng experience ko ibinibigay ko sa kanila, tsaka lahat ng mga mali sinasabi ko sa kanila. Nagpe-prepare talaga sila at talagang gustong makuha lahat ng gold,” batbat ni Bustamante, kinsa kanhi sab world champion.
Gawas kang Amit, ang ubang sakop sa national team mao sila si Floriza Andal, Carlo Biado, Chezka Centeno, Johann Chua, Francisco Dela Cruz, Jeffrey Ignacio, Warren Kiamco, Dennis Orcollo, Iris Rañola, ug Efren “Bata” Reyes.
Ang mga kategoriya nga kombatihan mao ang 9-ball singles (men’s and women’s), 9-ball doubles (men’s and women’s) 10-ball singles (men’s and womens), 10-ball doubles (men’s and women’s), Carom (men’s), snooker singles (men’s), snooker doubles (men’s) ug English Billiards (men’s). ESL