NAKADESISYON ang Sugbuanong higante nga si JuneMar Fajardo nga himuon ang iyang kaugalingon nga daw si Joker sa kasaulogan sa Halloween.
Ang five-time MVP sa Philippine Basketball Association (PBA) nag-post og mga hulagway sa iyang Instagram page diin nag-costume ug nag-makeup na siya nga daw si Joker, bida sa labing bag-ong Hollywood blockbuster movie nga gidala ni Joaquin Phoenix.
“Is it just me or is it getting crazier out there?” caption ni Fajardo sa iyang gi-post nga mga hulagway.
Sa usa ka post, makita ang pambatong sentro sa San Miguel Beermen nga nag-makeup sa iyang kaugalingon aron sun-on ang dagway sa iconic character.
Sa laing hulagway, nagsul-ob na ang lumad nga taga Pinamungajan, Cebu og maroon suit ug sapatos nga adunay kolor nga green nga miterno sa iyang buhok.
Ang maong mga post ni Fajardo nakakuha dayon og linibo nga likes gikan sa iyang followers sa Instagram.
Ang Joker gisalida sa Pilipinas niadtong Oktubre 4. ESL