ANG Visayas United Truckers Association Inc. niapilar kang Mayor Edgardo Labella nga ipatuman ang moraturium sulod sa tulo ka buwan labot sa pag-impound sa mga truck ug trailer nga di kumpleto og dokumento sa ilang pagbiyahe.
Si Atty. Benjamin Cabrido, legal counsel sa VUTAI ug ang ilang presidente nga si Leoncio Cubarol Jr., nipadangat sa ilang suwat ngadto kang Labella niadtong Huwebes, Oktubre 31, alang sa ilang pormal nga paghangyo may kalambigitan sa direktiba sa mayor niadtong Oktubre 24.
“May we earnestly ask for a three-month moratorium of this campain on the basis of the public interest as these may affect the flow and transport of goods where volume is unusually high during this holiday season,” tipik sa hangyo sa VUTAI.
Ang 62 ka trucking company nga nagbase sa Sugbo adunay di mominos 800 ka trucks ug kapin 1,000 ka trailers.
Ang VUTAI nagkanayon nga ilang gisuportahan ang kampanya ni Labella labot sa mga illegal nga mga trailer nga nagdagan, apan ilang gihangyo ang mayor nga isyuhan una kini og citation ticket subay traffic ordinance inay i-impound ang ilang trucks ug trailers.
“We assure your office that all our members operate legally registered trucks and tractor heads,” padayag ni Cabrido.
Apan ang ilang atimanunon mao ang ilang mga trailer nga giguyod sanglit di tanan sa ilang mga miyembro nakakumpleto sa rehistrasyon isip public utility vehicle.
“Registration of trailers would cost our members more than P16,000 each, not to mention the red tape and the stringent requirements in each trailer registration,” dugang sa ilang suwat.
Ang mga miyembro sa VUTAI niingon usab nga bisan og ilang paspasan og pagparehistro sa ilang mga trailer, apan maglisod sila gumikan usab sa pagkasunog sa buhatan sa Land Transportation Franchising and Regulatory Board (LTFRB).
DI NA LTFRB
Si Regional Director Eduardo Montealto Jr. sa LTFRB VII nagkanayon nga kaniadto, ang ilang buhatan maoy mohatag og prangkisa sa mga trailer.
Apan karon gitangtang na ug adto na iparehistro sa mga operator ang ilang trailer sa Land Transportation Office (LTO) 7.
Si LTO Regional Director Victor Emmanuel Caindec nagkanayon nga gihatagan na nila og lugway ang mga trucker sa niagi pang tuig dihang siya niasumir isip pangulo sa LTO 7. PAC