NGANONG manguli ang kadaghanan sa ilang mga pinuy-anan atol sa Adlaw sa mga Santos ug Kalag?
Alang sa usa ka managkutay nga 30 na ka tuig nga seaman nga usa kini sa mga paagi pagpakita sa ilang pagyukbo ug paghigugma sa mga kabanay nga nitaliwan na.
Si Felix Bacho, 56, taga dakbayan sa Talisay, 3rd engineer nga seaman, kansang bakasyon o sa iyang pag-uli ang alang kaniya pilion niyang matunong sa adlaw sa mga Kalag ug mga Santos kay sa Pasko o uban pang okasyon sa matag usa ka tuig.
Kini aron di lang ang pamilyang’ mga buhi ang iyang mapakitaan sa paghigugma, kundi lakip na sa mga minahal sa kinabuhi nga nitaliwan na.
Pasabot ni Bacho nga parehong paghigugma ug pagrespeto ang iyang gihatag sa mga minahal nga buhi pa ug sa patay na.
Niadtong Lunes, Oktubre 28, lang siya naabot, apan nilahus usab dayon siya sa lubnganan sa iyang mga ginikanan, apohan ug uban pa nga katiguwangan.
Iyang giangkon nga nituo siya nga gawas sa pag-ampo, direkta sa kahitas-an, ang pag-ampo pinaagi sa mga nitaliwan nga kabanay, ang makatabang usab nga daling’ madungog ang mga giampo.
“Motuo gyud ko nga bisan unsa nga imong mga pag-ampo nga ipaagi nimo sa imung mga katigulangan, dunggon gyud kini sa Ginuo. Sa matag abot ug lawig nako og balik, moduaw gyud ko dire (sementeryo) kay gawas sa pag-ampo alang nila, kanato, pasalamat na usab nila, kay wala ta kon wala pa usab sila,” pasabot ni Bacho
Susama usab niini ang panahom sa uban pang mangduaway sa sam-ang sa Dakbayan sa Talisay. Hinuon sa Biyernes sa buntag, Nobyembre 1, sa mga sam-ang sa dakbayan sa Talisay menus pa lang ang pagdagsa sa nga tawo. Apan gilantawan na sa Talisay police nga sugod karong hapon hangtud na sa gabii, ang pagdugok sa mga manuaway. FMD