MIUMOL na og task force ang Probinsya sa Sugbo nga maoy magtinabangay sa pagplano ug pagpangita og solusyon sa problema sa trapiko sa Sugbo atol sa gipahigayon nga Metro Cebu Development and Coordinating Board (MCDCB) meeting niadtong Martes, Oktubre 29, 2019
Tungod sa problema sa trapiko, subling gituki sa board ang mga plano niining pagpamutang og roundabout sa mga intersection sa Sugbo.
Usa sa nakita nga suliran ni Gobernador Gwendolyn Garcia mao ang daghang mga traffic light nga gipangmuntar sa mga intersection sa mga highway, labina sa habagatang Sugbo.
Gusto sa gobernador nga pagngon ang mga traffic light, labina sa Dakbayan sa Talisay ug Minglanilla.
“Kung himuon na kuhaon ang traffic light butangan ug rotunda aron diretso na free flowing na ang traffic”, matod ni Garcia.
Matod sa gobernador nga ang mga local government unit (LGU) sa mao nga mga dapit uyon usab niini, apan wa pa masayri kon kanus-a himuon.
Ang sakop sa Task Force nga gilangkoban sa Department of Public Works and Highways (DPWH), Traffic management team sa lokal nga kagamhanan, diin mahimong representante usab sa amihanang bahin sa Sugbo ang Dakbayan sa Danao ug Siyudad sa Carcar sa habagatan.
Lakip usab ang pribadong sektor mosusi pag-usab sa mga intersection nga mamahimong mabutangan og U-turn slots.
Ang roundabout maoy usa sa paagi nga giladlad ni Garcia aron matunhay ang sitwasyon sa trapiko sa mga lungsod.
Buot ipasusi ni Garcia ang 63 ka mga intersection.
Una nang mipadayag ang gobernador sa maong plano apan gibabagan kini sa DPWH.
“Ni present ang DPWH. Primero nilang presentation gi-turn down dayon to (roundabout) kay no longer needed daw unya inconvenient”, matod ni Garcia.
Mokantidad og gibana-bana sa P9 milyunes ang paghimo ug roundabout samtang ang proposed plan sa DPWH nga interchange gastuhan og di momenos P800 milyones.
Buot ni Garcia nga ikonsiderar sa DPWH ang pagbutang og roundabout tungod kay alang niya gawas nga di mahal ang paghimo niini, mas sayon usab kini ipatuman nga dili na maabtan pa og katuigan sa paghimo. ANV