GAWAS sa rotating brownout nga gipahamtang karon sa Davao del Norte Electric Cooperative (Daneco), duna sab 'job rotation' nga himuon sa maong kooperatiba.
Sa gipagawas nga press release sa Daneco nga nakuha sa Superbalita, nasayran nga nakatakdang maglusad og 15 ka adlaw nga rotation sa trabaho sa mga empleyado kon "job shedding".
Kini luyo sa gipatumang manual load dropping matrix sa National Grid Corporation of the Philippines (NGCP) ngadto sa Daneco.
Hinoon, ang maong lakang ipatuman lamang kung magpadayon ang pagkunhod sa suplay sa kuryente sa Daneco hangtud sunod bulan.
Gisulti sab ni Allan Laniba, OIC-General Manager, sa Daneco nga tungod sa pagdayong pag-dropping out sa NGCP sa suplay sa kuryente ngadto sa Daneco makasinati og labing taas nga napulo ka oras nga rotating brownout sa lalawigan sa Davao del Norte ug Comval.
Gidugang sab ni Laniba nga ang ilusad nga 'job shading' sa Daneco may kalabutan sab kini sa gipatuman nilang pagdaginot taliwala sa krisis sa enerhiya nga nasinati karon sa nasud.
"Yes, we will enforce job shedding to resolve the problem," sulti ni Laniba sa paghinabi sa mga tigbalita. (Marvin Pineda)