NANGATANGGONG og upat ngadto sa unom ka mga oras ang mga pasahero sa Angasil Wharf sa Dakbayan sa Lapu-Lapu human wa pabiyahia sa Maritime Industry Authority (Marina) ang pipila ka mga bangka nga pasaheroan padung sa isla sa Olango.
Dunay mga bangka nga nakaplagan sa Marina nga wa makatuman sa memorandum sa Marina-7 Circular No 2016-02 kun kalabot sa Revised Rules on phaseout of Wooden Hulled Ships carrying passengers in domestic shipping.
Duna untay tugotan sa pagbiyahe bisan kahoy pa ang bangka, apan nakalapas usab kini sa lagda sa kaluwas kay di makasul-ob og life jacket ang mga pasahero. Pipila ka mga pasahero nga nasuprisa sa maong kalamboan nagbagotbot sa kalangay sa ilang pagsakay, uban kanila giingong naabtan ug upat ngadto sa unom ka oras una nakasakay gumikan sa kakuwang og masakyan.
Adunay mga motorbanca nga mahimong untang makabiyahe kaniadto apan gigaid sa pantalan gumikan kay wa na silay permit nga makabiyahe.
Pipila ka mga buwan ang nakalabay, nagkrisis usab sa Olango kay wa pabiyahia ang gagmay nga mga sakyanan sa dagat tungod sa kadagku sa mga bawod.
Matod ni Atty. Daniel Martin Oral, legal officer sa Marina 7, unom ka mga motorbanca ang natagaan og extension sa ilang permit sa pagkakaron.
Kini human sa gipahigayong makuting evaluation sa Marina-7 nunot sa pag-usab na unta sa mga kahoy nga motorbanca ngadto na sa fiber glass. Ang unom maoy magbiyahean sa Angasil Wharf ug Hilton Wharf.
Kaniadto adunay mga 10 ka mga motorbanca ang magbiyahean sa mainland sa Lapu-Lapu paingon sa isla sa Olango.
“Gi-evalaute tanan banca diha. Unya naay uban nga na extend naay uban nga wala, permi nami extend-extend bisag 2016 naa na ang circular para phaseout. Pero prior sa atoang Oplan Biyaheng Ayos, naa mi gi-conduct nga monitoring unya naa may deficiency ang uban mao niisyu mi og cease and desist order,” matod ni Oral.
KALAPASAN
Kasagaran sa mga hinungdan nga naisyuhan og CDO sa ilang pagbiyahe mao ang kakuwang sa pag apod-apod sa mga pasahero og life jacket.
Ang uban adunay life jacket apan di ipasuot sa mga pasahero gumikan kay hugaw.
Awhag ni Oral sa mga nanag-iya og motorbanca sa pagsunod sa memorandum circular sa Marina-7 aron tugotan pa nga makabiyahe isip pampasaherong motorbanca.