MORAG napikal na siguro si Pres. Rodrigo Duterte niining sigeng pagsaway ni Vice President Leni Robredo kabahin sa iyang kampaniya batok sa illegal nga drugas. Kini gumikan kay si Duterte mismo mitanyag og mihagit naman ni Robredo nga maoy mangulo sa kampaniya batok sa illegal nga drugas. Una niini, ang Bise Presidente kusganong misaway sa anti-drug campaign ni Duterte nga matod pa pakyas ug nanawagan nga i-review ang strategies niini aron mamahimong epektibo.
Nanaway ang bise presidente apan way gitanyag nga solusyon. Mi-ulbo ang kaspa sa Presidente, mihagit kang Robredo nga mangulo sa anti-drug campaign. Ayaw na lang ta ana kay wala man gani makasulbad si Duterte nga way kukaluoy nga mopapatay, kana pang babaye nga malumo og kasing-kasing?
Babaye si Robredo ug nahibawo naman kita kon unsa ka huyang og baruganan ang usa ka babaye. Malumo og kasing-kasing nga daling maluoy. Kining kampaniya batok sa illegal nga drugas dili ni puwedeng mitir-mitiran. Kinahanglan nga lig-on ang imong baruganan ug di magpanuko sa pagpatay kon gikinahanglan. Sindikato ang gikabangga sa gobiyerno. Nasayod man mo sa binuhatan sa mga sindikato. Kuwarta ang gipalakaw uog mopatay pod na sila kon gikinahanglan.
Tinuod, dili lang patay o dakop ang solusyon sa pagkuyanap sa illegal nga drugas. Naa pod diha ang insaktong educational campaign ug rehabilitasyon. Apan kining duha ka estratehiya mabaw lamang kon maghisgot ta sa gilawmon sa problema sa illegal nga drugas. Educational campaign mao ang pagpasabot sa katawhan sa epekto sa paggamit og drugas aron nila likayan.
Rehabilitation, himuon lamang kini ngadto sa tawo nga nagumon sa illegal nga drugas aron makabalik sa katilingban o manimuyo nga normal. Apan ang tinubdan sa drugas, unsaon pagsumpo? Mga adunahan ang nagpaluyo niini nga andam mobangga ug mosungag gobiyerno aron magpabilin ang ilang negosyo. Pasagdan lang na nimo? Gani sa pagkakakaron nga daghan nang gipamatay nga ilegalista, misibaw gihapon kining maong matang sa negosyo. Unsa na kaha kon huyang ang mamuno sa kampaniya batok niini, sama kang Robredo? (bobbygnalzaro@gmail.com)