WALAY tawo nga wa masayop. Apan lahilahi ang atong pagdawat sa kasaypanan. Adunay magmahay lang. Pagbati kini nga aduna tay nahimong dili maayo. Sagad mawad-an ta og kalinaw. Sagad pod ang pagmahay maoy unang ang-ang lamang nga ang pagasundan sa pagbasol. Diha sa pagbasol mitabok ang nasayop ngadto sa kaakohan. Kon adunay nahitabo nga dili maayo, kita ang responsable niini. Aduna say mga leksyon nga ikatudlo ang maong kasinatian.
Ang ikatulong ang-ang mao ang paghinulsol. Pagbasol kini nga inubanan og pagsalig sa kaluoy sa Dios. Pagbasol kini nga andam motalikod sa mga naandan aron magpuyo og bag-ong kinabuhi. Kon sa pagmartsa pa kini, ang mando mao “to the rear, march” o “pabalik, kad”. Dili lamang usa ka butang o kinaiya ang gibasolan kondili ang oryentasyon sa kinabuhi ug ang “lifestyle”.
Tulo ka butang ang gihimo ni Zaqueo nga makaingon ta nga naghinulsol siya. Una, mihatag siyag luna kang Jesus nga milabay sa lungsod nga mao ang Jerico. Mikatkat siya sa kahoy nga sikamoro aron malantaw niya ang Ginoo. Gihatagan niyag higayon nga mapukaw ang iyang pagtuo. Ikaduha, katunga sa iyang kabtangan gihatag niya sa mga kabos ug kon may nalimbongan siya ulian niya kini og maka-upat nga pilo. Ikatulo, mipatuo siya kang Jesus sa dihang gimandoan siya sa pagkanaog sa kahoy aron moabiabi sa Ginoo ngadto sa iyang panimalay.
Mga ebidensya kini sa tinuoray nga paghinulsol.
Sa libro sa Kinaadman makita nato ang mga rason kon nganong masaligon kitang mobalik sa Dios sa dihang makasala ta. Bisan sa atong pagkagamay – gani kon itandi ang tibuok uniberso sa gahom sa Dios daw hamog sa kabuntagon lamang – gihigugma kita sa Ginoo nga hinimo ta Niya ug kita nagpabiling buhi tungod sa Iyang kabubut-on. Mao man gani nga hinayhinay ang pagbadlong sa Ginoo sa mga makasasala aron sila maghinulsol.
Dako kaayog tabang ang pag-ampo aron mapahigayon ang paghinulsol. Sa ikaduhang sulat ngadto sa mga taga-Tesalonica, si Pablo nagkanayon: “Kanunay kaming nag-ampo alang kaninyo, nga ang atong Dios mohimo ninyong takos sa Iyang tawag...” Ang gahom diay sa paghinulsol wala magagikan sa tawo hinunoa Iyaha sa Ginoo. Mao nga kinahanglan mag-ampo kita sa mga makasasala imbis na i-kondenar lamang sila.
Milabay na pod ang tinuig nga Adlaw sa mga Santo ug Adlaw sa Mga Magtutuo nga Mihalina. Gi-ampo nato ang anaa pa sa Purgatoryo ug nangayo kita sa pangaliya sa mga anaa pa sa Purgatoryo ug sa mga atoa na sa Langit. Hinaot nangayo kita kanila sa grasya sa paghinulsol aron kita tanang tanan magkakuyog puhon sa Langit. Hinaot usab atong pahimuslan kanunay ang sakramento sa kompisal, usa ka epektibong sandayong sa kaluoy ug puangod sa Dios.
Nakapanghinulsol na ba kita?