SA usa ka tunghaan sa kolehiyo nagsugod ang love story nila ni Jeffrey ug Inocencia “Cynthia” Busa-Ejusa.
Unang nagkrus ang ilang dalan sa dihang nagtungha pa sila sa kursong Information Technology sa Asian College of Technology sa siyudad sa Sugbo.
Si Cynthia, 24, unang nakabantay ni Jeffrey dihang pulos sila third year college.
Nakabantay siya nga daw sama sa usa ka babaye ang nilihokan ni Jeffrey, 24.
Sa dihang nagka-classmate na sila sa fourth year college, sila nagkasuod.
Sila si Jeffrey ug mga kauban sa grupo nga pirme mag-una og submit sa ilang thesis, gipatabang sa ilang adviser sa grupo nila ni Cynthia.
Tungod kay nagkasuod na, magtextanay na ang duha ug magsige og comment ang lalake sa mga post sa babaye sa iyang Facebook account.
Nabati ni Cynthia nga daw sa duna nay motibo si Jeffrey niya sa mga gipakita niini ngadto niya.
Siya na-attract na sa lalake tungod sa kapormal niini molihok. Labaw sa tanan, gumikan sa lips ug mga mata niini.
Mas nilawom ang iyang pagbati dihang iyang nakita kon unsa ka responsabli si Jeffrey sa iyang pamilya.
“Responsabli siya bisag uyab pa mi. Maayo siya moatiman sa iyang pamilya,” asoy ni Cynthia.
Nikumpisal ang lalake sa iyang gibati ngadto kang Cynthia human sila ni-graduate.
Human sa usa ka tuig, gisugot niya si Jeffrey niadtong Enero 23, 2016.
Paglabay sa tulo ka tuig, niadtong Marso 5, 2019, usa ka singsing ang gitunol ni Jeffrey kang Cynthia ug gipangutana kini “Will you marry me?
Ang duha nagbinayloay og “Yes I do” niadtong Septiyembre 23, 2019 sa Cebu Metropolitan Cathedral, ning dakbayan sa misa nga gipangulohan ni Padre Glenn Guanzon.
Espesyal ang petsa 23 alang nila ni Jeffrey ug Cynthia kay mao kini ang ilang monthsary o ang adlaw nga gidawat sa babaye ang gugma sa lalake.
Si Cynthia mamahimo na nga inahan kay lima ka buwan kini nga nagsabak karon. SCG