Vallena: Maanindot kon magtindak

SA usa ka estorya sa Yahoo, ginganlan ang mga isla sa Kabisay-an, apil na ang Cebu niini, nga apil sa pipila ja mga dapit sa kalibutan nga maanindot suroyan nga magbiseklita. Naapil ang Kabisay-an sa pipila ka mga dapit sa kalibutan nga nindot tindakan tungod sa maanindot nga mga talan-awon.

Gitumbok sa estorya ang maanindot nga kabaybayunan sa Kabisay-an kon magtindak ka. Di ni ikalimod kay nalibot ko na man ni ang Cebu gikan sa south ngadto sa kinatumyan sa norte, imo bitaw makita ang maanindot nga mga talan-awon kay malantaw mo ang kadagatan.

Sa bata pa ko hangtod karon, usa ni sa rason nganong di ko matulog kon magbiyahe tungod kay ganahan kong maglantaw sa mga talan-awon nga maanindot. Scenic tuod kaayo.

Mas maanindot unta kon ang karsada gikan sa south ngadto sa norte anha na molagbas sa mga lugar nga duol sa dagat. Kaanindot kaha? Unya butangan kini og bike lane aron mas luwas ang mga magbiseklita.

Gawas sa imprastraktura, magbutang usab og bike rental stores, diin mahimo kang makaabang og biseklita. Mahimo baya kaayo ni kon duna lay suporta sa kagamhanan kining mao nga ideya. Kay kini usa sa mga paagi nga makapadasig sa mga turista sa pagbisita dinhi.

BISEKLITA

Nahibawo ka ba nga sa Guangzhou City, ikatulong labing dako nga siyudad sa China, maagian nimo ang mga biseklita nga naa lang daplin sa dan? Maabangan kini sa tag P40 ang oras. Mahimo ra nimo ning mabilin sa bisan asa nga dapit kay mo-lock ra kini og balik.

Di ka mohatag og kwarta nga pisikal. Dunay app ang imong cellphone nga toa nimo isud ang imong kwarta, sama sa Gcash sa Globe ug PayMaya sa Smart. Matag biseklita, dunay lock nga dunay QR code. Imong i-scan ang QR code ug mobayad ka gamit ang app. Human og bayad, mobuka ang lock ug pwede ka nang motindak. Mao na nga bisan sa ka moderno sa ilang siyudad, daghan ang magbiseklita. Dinhi sa atoa mahadlok tang magbiseklita kay samok kuno sa dan. Naa man sab guy mga siaw, apan pipila ra man sab sila.

WAY SAKYANAN

Sa pipila ka modernong mga nasod sa Europe, dunay mga dapit nga nibalik sa biseklita, inay nga magsakyanan. Ilang naamguhan nga mas minos ang sakyanan sa dan, mas minos ang pollution. Gawas nga nakatampo sa kaayuhan sa kalikupan, naka exercise pa.

Kanus-a kaha kita mousab sa atoang mentalidad? Kusog tuod kaayo tang mokampanya pagsupak sa pagpamutol sa mga kahoy. Kaanindot usab unta kon kining mga environmentalist mo level up, magbiseklita na lang sila, di mag-awto. Mahimo kaha ni nila?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph