USA na ka semana nga nagatago-tago si Eliseo kay may duha ka tawo nga buot mopatay kaniya. Nahibawo na siya nga mga pulis kini sila nga suod nga higala ni Damian, drug pusher sa ilang lungsod. Dili si Eliseo drug pusher, apan nakatangdo siya kang Damian kay nagkinahanglan siyag kuwarta alang sa masakiton niyang asawa. Gusto niya nga madala niya sa ospital si Catalina kay gusto niya nga mabuhi pa kini kay mahal niya kaayo ang iyang asawa. Duna silay mga panumpa nga dili gayud sila magbuwag, nga ang kamatayon da ang utlanan sa ilang pagminahalay.
Nawad-an siyag trabaho kay giputbol siya sa civil engineer sa konstraksyon nga iyang gitrabahoan. Busa ang gitanyag kaniya ni Damian nga trabaho iyang gidawat, ug napayuhot niya ang maong mga ginadiling drugas. Apan giingnan niya si Damian nga mao da kadtong higayuna nga dawaton niya ang trabaho ug dili na siya mousab, kay mokuyog siya sa panagatan ni Ingko Bestre, ang dato nga may dakong panagatan sa ilang lungsod.
Apan naunsa ba nga buot na man siyang patyon? Ang unang buot mopatay niya mao ang grupo nilang Damian, ug ang ikaduha mao ang grupo nilang Teofino, ang pulis nga protektor sa mga durugista dinhi sa ilang lungsod. Kausa nakaambak siya sa bentana dihang gipusil siya nilang Damian. Sunod nakalukso siya sa lawom nga tulay sa ilang balangay. Wala siya nila mapatay. Gusto unta niya nga mopahilayo na siya sa ilang lungsod ug dili na mopatim-aw sa ilang balangay, apan mag-unsa na lang si Catalina, iyang asawa, nga dakong masakiton?
“Eliseo, patay na ang imong asawa. Wala na makaagwanta sa iyang sakit,” pahibawo ni Neryang, ig-agaw ni Catalina, nga naninda og mani sa eskina.
“Ginuo ko, nganong nahitabo man ni nako? Neryang, dili ko makaadto sa balay kay may nag-atang nako. Ila kong patyon,” ni Eliseo nga nagluha ang mga mata. “Ikaw na lay bahala sa haya ni Catalina.”
Miyango si Neryang. Milakaw dayon si Eliseo nga nagpanglingi, kay bisag kasikas sa unas sa saging iyang gikahadlukan.
NOBIYEMBERE 2. Milighot si Eliseo paingon sa sementeryo. Nagkawo siyag kawo nga kinawboy. Iyang gipayungyong sa iyang nawong. Ug natultolan dayon niya ang dapit diin ilubong si Catalina, kay gisultihan man siya ni Neryang nga ang lubnganan sa iyang asawa nahimutang kini ilawom sa dakong akasya.
Miluhod si Eliseo sa tiilan sa lubong sa iyang asawa ug namulong, “Day Lina, pasayloa ko nga wa ko diha sa imong kiliran sa oras nga gibawi na sa Labawng Makagagahom ang imong kinabuhi, kay may naggukod nako. Nagatago-tago ko. Apan, Day, dili tawon ko drug pusher. Nahitabo lang nga nakasugot ko kang Damian. Karon buot na ko nilang patyon. May mga pulis na pod nga buot mopatay nako,” mihilak si Eliseo ug midanguyngoy. Unya milingi siya ug iyang nakita si Teofino nga midalig sul-ob sa iyang bonnet, ingon man ang mga kauban niyang pulis.
“Dinhi ka na lang kutob, Eliseooooo!” lanog ang tingog ni Teofino. Ug milanog ang lima ka buto sa kalibre .45 nga pistola ug natusak-tusak ang lawas ni Eliseo.
Nakita sa mga tawo nag-ubo si Eliseo nga naggakos sa krus sa nitso sa iyang asawa, dayon natighaya kini nga wa nay kinabuhi. Taudtaod, gisangpit siya sa iyang asawa nga nalipay sa iyang pag-apas. Naggunitay sila sa ilang mga kamot ug nanglakaw subay sa itom nga dalan sa Nobiyembre.
(KATAPUSAN)