NAHIMONG behikulo ang mensahe ni Davao City Mayor Sara Duterte-Carpio sa pagtabang sa mga nabiktima sa linog sa North Cotabato ug Davao del Sur nga miresulta sa daghang grupo ug indibiduwal ang mipaabot og tabang.
Human sa linog niadtong Huwebes, Oktubre 31, nga midamyos og daghang propedad nagpasiuna og padala og mga relief goods ang lokal nga kagamhanan sa Davao City ngadto sa mga lugar diin asa daghan ang nanginahanglan og tabang.
Gilayong mipagula og pamahayag ang mayor nga modawat ang Davao City alang sa mga hinabang pinaagi sa Task Force (TF) Davao.
“Since we do not have evacuees and victims can be taken care of by the City Government of Davao, we shall direct donations to where they are needed the most this time — to the provinces of Davao del Sur and North Cotabato. Donations should be delivered to the Task Force Davao Headquarters at the Sta. Ana Wharf, c/o Col. Consolito Yecla,” sa pamahayag sa mayor.
Human niini, sunod-sunod nga nangabot sa TF-Davao headquarters sa pantalan sa Sta. Ana ang mga relief goods ug gilayon sab nga gipanghatud ngadto sa mga lugar sa Davao del Sur ug North Cotabato.
Daghan sab nga mga grupo ang mihimo og susamang paagi aron mapaabot ang mga hinabang didto sa mga biktima sa linog.
Bisan ang SunStar Davao Publishing Inc., mihimo sab og susamang pamaagi aron makatabang sa mga nabiktima sa linog nga ning panahona nagkinahanglan gayod og tabang.
Alang sa mga buot mopaambit sa ilang grasya, mamahimo ninyong ihatud ang inyong mga relief goods sa buhatan sa SunStar Davao sa Ebro-Pelayo Building (Old DFA office) Jacinto Street, tapad sa Holy Child School of Davao, ning siyudad.