ATONG pahalipayan ang atong kapulisan ning dakbayan gumikan sa pagkasikop sa mga suspetsado sa pagtulis ug pagpatay sa usa ka 14 anyos nga sakristan. Dali ra kaayong nadakpan ang mga suspetsado sa gihimong follow up operation sa kapulisan. Mao nang maka-ingon ko nga kon molihok ug dili lang magtinapulan kining atong mga pulis, dali ra gyod nga masulbad kining krimen nga nahitabo dinhi sa ato.
Congratulations for a job well done nila ni S/Supt Patrocinio Comendador, ang city director; ni S/Inspector George Ylanan, ang hepe sa Investigation Detective and Management Branch sa Cebu City Police Office ingon man si Sr./Inspector Mario Monelar, ang hepe sa Guadalupe Station, diin nahitabo ang krimen. Pero mao lagi nang akong kanunay ipahimangno sa kapulisan nga dili gyod mokompiyansa. Gikinahanglan pa nilang mokuha og dugang ebedensiya aron lig-on gyod ang kaso ug mapahamtangan og tukmang silot ang mga akusado.
NAMATAY GYOD
Namatay gayod niadtong miaging adlaw si Danilo Cabaluna, ang barangay tanod sa Basak Pardo, kinsa napulisan sa tulisan samtang mitubag sa alarma sa tulis niadtong miaging semana.
Hangtod karon wala pa gyod madakpi ang mga suspetsado nga nailhan nga sila si Christopher Aldo, alyas Abay-Abay, ug Aldrin Almento, alyas Junskie, bisan kon aduna na kiniy patong sa ulo nga P100,000.
Ang kaso ni Cabaluna ug ang laing kaso sa barangay tanod sa Camputhaw, maoy nakapapukaw sa isyo kon angay bang tugutan nga makahupot og armas ang mga tanod. Kanang paghupot og armas wala lagi gyod nay problema basta legal lang ang paghupot. Mo-comply sa tanan nga mga requirement ang tanod unya moagi og training.
GANG WAR
Kining nagpadayon nga gang war tali sa Bloods ug Crips gang nakapadugang sa kriminalidad dinhi sa atong dakbayan. Maayo lang lagi unta og sila ray magpatay. Apan ang nakaparat kay dunay mapagan nga inosenteng sibilyan. Sama niadtong nahitabo niadtong Martes sa kadlawon sa Barangay Tejero. Dihay usa ka menor de edad ang napatay kay napagan sa dihang gipamusil sa magkaribal nga gang.
Naglabad ang ulo sa atong kapulisan ning gang war kon unsaon nila paghunong o pagpuhag. Ang usa lang gyod ana mao ang presensiya ug ang kanunay nga pagpatrolya sa atong kapulisan sa giilang estambayan ning maong grupo. Nganong yano ra man kaayong makadala og armas kining mga batan-on? Unya mas maayo siguro nga mopahigayon usab og dialogue ang atong mga opisyal sa barangay sa mga ginikanan aning mga batan-on nga gang members aron sila maoy mobadlong sa ilang mga anak.
(bobby@sunstar,com.ph/bgnalzaro@gmanetwork.com)