Editoryal: Hinaut nga di drama

Editorial Cartoon by John Gilbert Manantan
Editorial Cartoon by John Gilbert Manantan

GIRELIBUHAN si Cebu City Police Director Gemma Vinluan sa katungdanan samtang magpadayon ang imbestigasyon sa National Bureau of Investigation (NBI) sa kamatayon ni Clarin Mayor David Navarro. Kini aron kuno di makaimpluwensya sa imbestigasyon.

Gi-ambush si Navarro niadtong Oktubre 25, 2019 samtang nagsakay sa police patrol car padung sa Cebu City Prosecutor’s Office aron adto unta siya mopyansa. Gireklamo siyang namun-og sa usa ka masahista ug giakusahan pang nibastos sa laing babaye.

Daghan ang mga nakapangutana kon nganong way nabuhat ang escort nga mga pulis dihang sila gibabagan. Alerto na gud silang daan nga posibleng dunay mohilabot sa mayor kay ila na gud ning gipasul-ob og bullet proof vest ug gipatung-an pa sa duha ka mga pulis.

Maorag nakahibawo ang mga killer nga naka vest si Navarro, mao nga giseguro nila pinaagi sa pagpakanaug niini sa patrol car ug giulo sa pagpusil.

Bisan tuod ibutang nga naunhan sila ug nakuratan ang mga escort, apan way nakagukod kanila human sa hitabo? Way nakasulti sa mga pulis kon ila bang gigukod ang mga killer nga nakasakay dayon og balik sa van.

Hangtod karon, way nakakita sa CCTV nga hayan nakakuha sa gisakyang van, kana kon naa man.

Hinaut pa nga ang imbestigasyon sa NBI nga resulta sa mando ni Presidente Rodrigo Duterte dunay maayong padulngan ug klaro ang dagan sa imbestigasyon.

Maayo usab unta kon di lang ni drama ang tanan, pagpaka aron ingnon ba nga dunay tinguha nga molutaw ang tinuod. Kay kon tan-awon og maayo, sa kadaghan na sa mga local official nga gilambigit sa illegal drugs ug gipamatay, way gisangkoan ang imbestigasyon.

Suma gud sa pagpatay kang anhing mayor Mariano Blanco III, blangko gihapon ang imbestigasyon sa kapulisan. Kana kon nag-imbestigar ba usab lagi sila sa pagpatay sa mayor.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph