GENERAL Santos City-based SanMan Promotions fighter Romero “Ruthless/Mangtas” Duno nga taga Cotabato napildi sulod sa first round technical knockout (TKO) sa oras nga 1:38.
Midaug ang Mexican-American Ryan “KingRy” Garcia nga wala mahago ug wala paningta human gidabu-dabohan sa lawas ug ulo si Duno.
Ang Ruthless o Mangtas nga pinoy fighter nga si Duno bisan gilamok sa kinumo apan gunikan sa kaisog misuway nga misungsong apan wala makasungasong hinungdan nga natumba.
Si referee Tony Weeks wala na maglangan paghunong sa away human nakita nga dili na makaya dungan sa pagkatumba ang right straight ug hooks o walop nga kombinasyon nga giburak ni Garcia.
Gumikan sa kadaugan ni Garcia nakuha niya ang duha ka bakus nga bakanteng World Boxing Council Silver ug World Boxing Organization NABO Lightweight titles.
Ang nagbase sa Victorville, California nga si Garcia misaka na sa (19W-0L, 16KO) samtang ang Bisaya nga boksidor nga si Duno nadakin-as sa (21W-2L, 16KO).
Ang Duno vs Garcia, gitakda unta nga 10-round fight nga mao'y top supporting main event sa Mexican Saul “Canelo” Alvarez vs Russian Sergey “Krusher” Kovalev nga gidalit sa Golden Boy Promotions nga gisalida sa DAZN Pay Per View.
Si Duno mao'y ikaduha nga boxers sa SanMan Promotions nga napildi sa Amerika. Sa miaging semana napildi si Butuan City, Agusan del Norte native Mark “Machete” Bernaldez batok Andy Vences pinaagi sa unanimous decision didto sa Reno, Nevada.
Hinuon ang laing sakop sa SanMan Promotions nga si Mike “Magic” Plania midaug sa miaging semana batok sa Nicaraguan nga si Julio Buitrago via TKO4 didto sa Miami, Florida. (Daniel Quindao Guden, US Correspondent)