UNSA kining linog? Nganong talagsa ra kaayo ning masinati nato? Pero kung tay-ugon manta og linog mas dako ang kadaut kon itandi sa ubang mga trahedya sama sa bagyo ug uban pang mga kalamidad nga gimbut-an sa panahon sama sa lunop ug baha.
Pero kon kita maoy papili-on bisan asa niini nga trahedya wala kita'y gusto, pero, wala kita'y kapili-an kay dili kita’y tag-iya sa kalibutan kung dili igo lang kita gipapuyo ug walay kagustohan nato nga matuman kung dili sa kahitas-an ang Labaw’ng Magbubuhat sa langit ug yuta.
Dili kaha kining linog usa ka pagpahinumdon kanatong tanan nga sobra ra kaayong nagmahal sa mga materyal nga butang? Nagpalabwanay og kinsay milyonaryo ug bilyonaryo? Nagmahal sa mga materyal nga butang nga bisan pa og maghanig ka niini walay usa ka dako nga dalhon nimo sa imong lubnganan?
Dili kaha kini pahimangno sa Diyos kanato nga sobra rang nagmahal sa bahandi? Akong namatikdan karon nga ang mga pastor wala na magdala og simbahan, mao na'y sagad nalambigit sa mga “scam” pagpangluko sa mga tawo nga ang ilang kuwarta tuboan daw kuno og 40 porsiyento, ug kon makalugar ilang idagan? Kay kon magsalig sila sa koleksyon sa simbahan, dugay man silang maadunahan?
Kuwarta na ang gipaka-Diyos sa mga pastor karon, magbutang og mga branches didto sa Estados Unidos kay dolyar man ang kitaon, kay ang 1 milyon dollar nga ilang kitaon didto P50 milyon naman dinhi sa Pilipinas unya, pakapinan pag mga high-powered nga armas?
Gipanghadlok ang mga tawo nga kon dili motuman sa paghatag og ikapulo ug uban pa nga mga hadlok kaayo nga koleksyon silotan sila sa Diyos, ug tungod kay dili man manaug ang Diyos dinhi sa kalibutan, ilang gibaligya ang ngalan sa Diyos ug sila ang nadatu samtang nagkagidlay ang mga sakop niini.
Linog, dili kaha sinugdanan kini sa silot sa Diyos sa mga tawo nga nahikalimot na Kaniya? Una, si Noah nga gipatabang ang mga tawo paghimo og Arka kay hugasan sa Diyos ang kalibutan pinaagi sa 40 ka adlaw nga lunop, apan ang mga tawo gitawag pa si Noah og buang-buang, unsaon nga naglagiting man ang tumang kaiinit sa kalibutan unya maglunop na hinuon niadtong mga panahona?
Ang Diyos nangayo og 50 ka magtutuo sa siyudad sa Sodoma ug Gomora kay dili niya laglagon hangtud miabot kini og lima ka tawo kon aduna la’y magtutuo sa Diyos, apan bisan usa wala gyud nagtuo ug mahadlokon sa Diyos, mao nga iya kining gilaglag pinaagi sa pagsunog, ug si Lot lang ug ang iyang duha ka anak maoy naluwas kay ang iyang asawa nga gipasidan-an nga dili molingi, milingi man hangtud nga nahimong usa ka haliging asin.
Kining linog, dili kaha kini laing pasidaan kanatong mga katawhan sa kalibutan aron pagpahinumdom nga naglunang na kita sa kasal-anan? Ug wala na mahinumdom kaniya? Kay ang kuwarta mao na’y atong gipaka-Diyos dinhi sa kalibutan?
Panapos nga pulong ni Ginoong Jesukristo nga nag-ingon, “Unsay kapuslanan sa usa ka tawo nga maangkon niya ang tibuok kalibutan apan ang iyang kalag malaglag ngadto sa Impiyerno”. Mga pastor isip-isip labi natong utok sa scam.