DAVAO DEL SUR -- Nahupay kadali ang mga biktima sa linog human nakita ang presensya sa mga iladong personalidad nga hilom nga mibisita kanila ug nanghatag og hinabang.
Sa Tulunan, North Cotabato, gibisita ni Davao City Mayor Sara Duterte-Carpio ang mga biktima sa linog niadtong Sabado, Nobyembre 2.
Nagmaneho lamang ang mayor sa iyang motorsiklo dihang personal nga nibisita sa lugar ug nanghatag og food packs sa mga apektadong molupyo.
Naatol ang pagbisita sa anak ni Presidente Rodrigo Duterte samtang nagtigom ang mga lokal nga opisyal sa lugar.
Midalikyat sab si Mayor Duterte-Carpio sa Kidapawan City ug Makilala, North Cotabato nga apil sa nagrabehan sa pagtay-og sa magnitude 6.5 nga linog.
Sa Magsaysay, Davao del Sur, personal nga gitunol sa artistang si Angel Locsin ang iyang tabang sa mga biktima sa Magsaysay.
Dala niini ang sinakong mga bugas, grocery items ug mga binotelyang tubig kauban ang mga personahe sa Philippine National Red Cross (PNRC).
Nakita ang aktres nga miapil paghakot sa ginalong tubig ug mitunol sa mga biktima uban ang PNRC.
Nailhan na si Locsin nga dugay rang matinabangon ug naga-adto sa mga lugar bisan delikado sama niadtong Marawi siege diin mihatag sab og tabang sa mga bakwit sa gyera.
Sama sa Magsaysay, gikagubtan sab si Locsin sa mga biktima sa Makilala, North Cotabato diin ang uban nagpa-selfie kaniya.
Kagahapon sa buntag, miabot sab si Senador Tolentino diin nanghatag og hinabang sa lungsod sa Magsaysay, Davao del Sur ug gikuyugan kini ni Mayor Arthur Davin sa pagbisita sa mga dapit nga naigo sa linog.
Milahos sab kini sa lungsod sa Makilala, Kidapawan City ug Tulunan, North Cotabato aron sutaon ang kahimtang sa mga biktima sa linog. (OBD)