GILAUMAN nga mas makapaukyab ang Slam Dunk competition sa Cebu Schools Athletics Foundation, Inc. (Cesafi)ning tuiga gumikan kay sa labing unang higayon, paapilon ang tanang imports.
Ang Slam Dunk competition lakip na ang three-point shootout mao ang mohatag og dugang kolor sa Cesafi All-Star Games nga ipahigayon karong Nobiyembre 10 sa Cebu Coliseum.
Nagkanayon si Cesafi deputy commissioner Danny Duran nga nakadesisyon sila niini human nila nasuta nga kuwang ang lokal nga manghansakay sa nangaging mga tuig.
“Mura’g na-boring man gud ang slam dunk competition sa una. Naay ubang participants maglisod man gani pag-abot sa ring,” matod ni Duran. “Maong this year, atong paapilon ang tanang imports para naa gyu’y excitement ang slamdunk contest. Apil sab tong local players nga kusog gyud manglayat.”
Ang imports nga mangapil pangulohan nila ni Lamine Thiam sa SWU-Phinma Cobras ug Sameen Swint sa USPF Panthers.
Naa sab sila si Tosh Sesay sa UC Webmasters, Las Coulinaly sa UV Green Lancers, Sommy Managor sa USC Warriors, ug Adama Camara sa USJ-R Jaguars.
Ang lokal nga mga magduduwa nga mosalmot mao ra sila si 2017 Slam Dunk champion Miguel Gastador sa USJ-R ug John Jabonete sa CITU Wildcats.
Sa three-point shootout, isagol na sab ang mga mangitsahay sa high school ug college divisions.
Ang mangitsa sa three-point shootout mao sila si Renz Solomon (USJ-R/College), William Polican (SWU/College), Sol Jade Ivan Tirol (CIT-U/HS), Imransev Nicolo Escobido (Don Bosco/HS), Kevin Kendrick Gulibao (USJ-R/HS), Shane Menina (UC/College), Jeco Bancale (UC Lapu-Lapu Mandaue/HS), Paul Galinato (UC/College), Joshua Magic Marata (USC/College).
Naa sab sila si Froiland Maglasang (UV/College), Neon Chavez (USPF/College), Nathaniel Montecillo (USC/HS), Jemerson Sable (CIT-U/College), Winston Bingil (Cebu Eastern College/HS), Christopher Isabelo (USPF/HS), ug Justin Dominic Maglasang (Ateneo de Cebu/HS). (ESL)