NASUGAMAK na sab sa laing kapildihan ang 5-time champions Golden State Warrrios batok sa Charlotte Hornets, 87-93, kagahapon sa National Basketball Association (NBA).
Taliwala sa ilang kapildihan, nga maoy nagpahagsa sa ilang rekord ngadto sa 1-5, si Warriors coach Steve Kerr mapasigarbuon gihapon sa gipakita sa iyang mga batos gumikan kay ningkombati sila nga wala’y bisan usa ka starter.
Ning duwaa, nadugangan ang kalbaryo sa Warriors gumikan kay wala nakapakita og aksyon sila si Draymond Green ug D’Angelo Russell. Naangol ang wa nga tudlo ni Green atol sa 110-127 nga kapildihan sa Warriors batok sa San Antonio Spurs niadtong Sabado.
Ning maong duwaa, si Russell naangol usab ang iyang tuo nga tiil hinungdan nga wala siya nakaduwa batok sa Hornets.
Dili pa lang dugay, napiang ang wa nga kamot sa labing pambato sa Warriors nga si Stephen Curry ug gilaumang mga tulo pa ka buwan una kini makabalik og duwa.
Ang Warriors ningsugod sa 2019-20 season nga wala na si Kevin Durant, kinsa mibalhin sa Brooklyn Nets, unya wala sab si Klay Thompson, kinsa nagpaalim pa sa iyang angol sa tiil.
Bisan pulos bag-o ug dili mga ilado ang nahabilin nilang mga sakop, ang Warriors nakakombati gihapon og insakto.
Gani matod ni Kerr nga aduna unta’y posibilidad nga makuha nila ang kadaugan kon dili pa lang tungod sa iyang sipyat nga mga desisyon sa krusyal nga bahin.
Sa laing mga duwa, ningdaog ang Philadelpha 76ers batok Portland TrailBlazers, 129-128; Milwaukee Bucks batok Toronto Raptors, 115-105; Detriot Pistons batok Brooklyn Nets, 113-109; Phoenix Suns batok Memphis Grizzlies, 114-105; Denver Nuggets batok Orlando Magic, 91-87; Minnesota Timberwolves batok Washington Wizards, 131-109; ug Oklahoma City Thunder batok New Orleans Pelicans, 115-104. (AP, ESL)